BISAN kon busy siya sa paghimo og mga lakang aron di makakuyanap og maayo ang coronavirus disease (Covid-19) wa hikalimti ni Talisay City Mayor Gerald Anthony Gullas Jr. ang edukasyon sa mga batan-on sa siyudad.
Nakahuna-huna siya sa paglusad karong tuiga sa gitawag og “Cream of the Crop Scholarship” program alang sa mga mograduwar sa senior high school karong tuig tigtungha 2019-2020 sa mga pampublikong tunghaan.
Matod sa mayor nga daghan ang mga kabos nga tinun-an nga angay kaayong molahos unta sa college, apan way ikasarang sa gasto.
“In all honesty this was the program I was most excited about. It has always been my dream to give poor but deserving students a chance to live up to their potential and change the course of their lives for the better. I continue to lament that there are so many kids who were able to get a high school education but fail to proceed to college,” matod sa mayor sa iyang Facebook post.
Si Gullas niingon nga bisan wa pa ang coronavirus disease (Covid-19) pandemic, iya na kining nahuna-hunaan ug napagahinan og pundo.
Matod sa mayor nga niadtong 2018-2019, sa kapin sa 1,000 ka mga tinun-an nga ninggraduwar sa mga pampublikong tunghaan sa siyudad, 369 ang wa makalahos sa college, 13 kanila ang ninggraduwar nga “with honors.”
Ang scholarship itanyag ngadto sa mga tinun-an nga gustong mokuha og kursong engineering nga wa gitanyag sa Talisay City College, maoy iyang abagan.
“Take for example naay poor but deserving grade 12 student na bright kaayo og math, someone na dako kaayo og potential ma engineer. Then he or she deserves to go to one of the best engineering schools and programs in Cebu,” dugang ni Gullas.
Ang Department of Education (DepE) ang mohimo sa guidelines ug mopili sa angay nga tinun-an ug ang Siyudad di manginlabot.
Di usab patunghaon ang si bisan kinsang tinun-an sa ilang pamilyang tunghaan nga University of the Visayas.
Abagahon sa Siyudad ang tuition, miscellaneous fees ug uban pang mga bayranan. Hatagan usab ang matag tinun-an og P20,000 nga allowance matag semester.