GIBUTYAG ni Mario Napule pangulo sa City Traffic Management System (CTMS), nga wala pa sila manakop sa mga drayber sa motorsiklong dunay angkas apan wala magbutang og barrier.
Matod ni Napule, naghuwat pa sila sa kaugalingong executive order ni Lapu-Lapu City Mayor Junard Chan kalabot sa maong guidelines nga ibase usab sa lagda sa national guidelines labot sa backriding.
Sa pagkakaron, gibutyag ni Napule nga igo lang sila mopahimangno sa mga mag backride kalabot sa guidelines nga kinahanglan magtiayon ug nag-usa ug puyo sa usa ka balay gayud ang mag-backride sa motorsiklo.
Pahimangno ni Napule sa mga Oponganon nga kung mahimo huwaton lang una ang pormal nga kamandoan sa kagamhanan kalabot niini una magpa-ackride.
Kung siya hinuon ang pangutan-on isip iyang personal opinyon sa naasoyng hisgotanan mas maayong mag-face mask na lang o full face helmet ang angkas inay magbutang pa og barrier apan, kung ugaling mao na kini ang pinal nga madesisyonan sa ulohang kagamhanan, andam sila sa pagpatuman niini.
“Sauna pa gyud na si Mayor (Chan) nga okay gyud siya ana basta magtiayon lang gyud o nag-usa ug balay sauna ra gyud na niya gusto ang in-ana pero parte ana barrier sa ako lang ni (opinyon) ha pero murag delikado gyud,” pagpasabot ni Napule.
Samtang, gibutyag ni Napule nga moabot na sa walo ka mga sakyanan ang ilang na clamp sa ilang kampanya batok sa illegal parking .
Matod niya, mao kini ang katong mga sakyanan nga wala mopatuo sa pagbalhin sa ilang mga sakyanan bisan kapila na nila gipasidan-an hinungdan nga ila na lang kini nga gi-clamp.
Nalukat na usab ang maong mga sakyanan sa mga tag-iya ug ilang gipahimangnoan nga pangitaan na lang og laing dapit nga parkingan ang ilang sakyanan.
Giklaro ni Napule nga 24 oras ang ilang kampanya batok sa illegal parking sanglit aduna silay mga personnel nga mo-roving sa kadalanan sa dakbayan.
Lakip sa gidili sa kadalanan sa dakbayan mao usab ang pagbutang ug tulda daplin sa dalan sa bisan unsa nga okasyon sanglit makabalda usab kini sa trapiko ug sa mga mangaging tawo.
“Dili kaayo kaayo mi mo kuan (estrikto) gyud ug mahimo kay lisod kaayo naa pa ta sa pandemic mayawyawan unya ta kabawo naka pero ug no choice ug wala ang drayber diha amo gyud claman kay di man na pwedi ang ilang garahian ang karsada naman,” matod ni Napule sa Superbalita Cebu.(GCM)