KON ugaling i-downgrade na sa Inter-Agency Task Force for the Management of Emerging Infectious Diseases ang quarantine status sa dakbayan sa Sugbo karong Agusto 1, mabalik na ang pipila ka pampubliko nga transportasyon.
Matod sa Land Transportation Franchising and Regulatory Board (LTFRB) 7 nga 112 ka modern bus; 88 ka modern jeepney; 3,253 ka taxi; ug 236 ka Transport Network Vehicle Services (TNVS) ang makabalik na sa operasyon kon mag-GCQ na ang Cebu City.
Si LTFRB 7 Regional Director Eduardo Montealto Jr., nibutyag nga kining taxi, nakadagan na ang uban sa lalawigan sa Sugbo, apan kutob ra sa Dakbayan sa Talisay sa south ug Mandaue sa north.
Ang mga naasoy nga unit nahatagan og special permits niadtong unang gipaubos og GCQ ang Cebu City ug padayon nila nga magamit atol sa pagbalik sa GCQ status sa syudad.
Nasayran nga sa 200 ka modern bus ug jeepney, niabot na og 19 ka rota ang g-andam sa LTFRB 7 aron moserbisyo sa nagkadaiyang dapit sa Cebu City.
Gikatakda nga ipublikar sa LTFRB 7 ang maong mga rota, apan duha ra ka rota ang nabag-o niini gikan sa 17 nga napatuman niadtong niaging GCQ sa Cebu City.
Matod ni Montealto nga ang rota sa Tisa ug Oppra mao ang napuno.
HANGYO NI GARCIA
Subay usab sa hangyo ni Cebu Governor Gwendolyn Garcia, aprobado na kadtong 15 ka rota sa traditional jeepney nga modagan sa lalawigan.
Apan matod ni Montealto nga ipaubos pa sa check-up ang mga unit sa operators nga mopadagan sa ilang unit.
Ang Land Transportation Office (LTO) 7 personnel magsugod sa check-up karong Biyernes kon tugotan ba ang matag traditional jeepney nga makabalik og dagan.
Sa aprobado nga lista sa LTFRB 7, aduna’y 351 ka units ang possible nga mahatagan og special permit aron makadagan ang traditional jeepney sa lalawigan.
Si Montealto nagkanayon nga wala pa siya makadawat og application tungod kay mag-agad pa usab ang operators sa himuon nga check-up sa LTO 7 personnel.
Hinuon, sa e-mail ra ipaagi ang application sa operators.
Lakip sa rota nga anaa mao ang Liloan-Mandaue, Liloan-Mandaue, Lutopan-Poblacion Toledo, Talisay-Naga, Talisay-Minglanilla, Talisay-San Fernando, Lapu-Lapu City-Mandaue, Punta Engaño-LLC-Mandaue City, Marigondon-LLC-Mandaue City, Danao City-Mandaue City, Danao-Sogod, Consolacion-Mandaue City, Compostela-Mandaue City, ug Cordova-Mandaue.
Anaa sa P9 ang plete alang sa unang upat ka kilometro sa TPUJ ug P1.50 alang sa succeeding.
Pasabot ni Montealto nga mas mahal kini karon tungod kay ang kapasidad sa matag kinahanglan nga ikonsiderar kay katunga ra ang ikarga sa mga health protocol.
Gipahibawo usab sa publiko nga di mahibulong kon aduna’y mabantayan nga traditional jeep nga magdagan sa dakbayan sa Sugbo tungod kay gigamit kini isip service sa contact tracers sa dakbayan.
Giisyuhan nila ang 39 ka traditional jeep aron magamit sa contact tracers subay na usab sa hangyo sa IATF Cebu.