NILAPAS na sa 5,000 ka mga pasyente sa coronavirus disease (Covid-19) sa dakbayan sa Sugbo ang naka-recover sa mao nga sakit sa Hulyo 29, 2020.
Kini subay sa labing uwahing listahan nga gipagawas sa Department of Health (DOH) 7 human naka-recover niadtong Hulyo 28 ang 111 ka mga pasyente samtang 43 ka mga tawo ang bag-ong nataptan sa sakit.
Sa kasamtangan, ang Cebu City adunay 8,813 ka kumpirmadong kaso, apan 5,075 kanila ang nilampos pagpakigbatok sa Covid-19 samtang padayon nga nakigbugno ang 3,266 ka individual batok sa maong sakit.
Base sa impormasyon gikan sa buhatan ni Regional Director Jaime Bernadas sa DOH 7 nga 1,036 kanila ang naa sa tambalanan samtang 2,230 ang naa sa isolation centers o home isolation.
Si Atty. Rey Gealon, spokesperson ni Mayor Edgardo Labella, nagkanayon nga kini naghatag og maayong tilimad-on sa padayon nga paningkamot sa Dakbayan batok sa maong sakit.
Sa kinatibuk-an, niabot na og 58.7 porsyento ang recovery rate sa Cebu City , diin sobra sa gidoble ang recovery rate sa national.
Si Labella, sa iyang bahin, nanawagan sa katawhan nga ipadayon ang disiplina sa kaugalingon ug mosunod sa minimum health protocol para malikayan ang pagkatap sa virus. (PAC)