Ecleo natultolan, nadakpan

CEBU. Ang kanhi congressman sa Dinagat Islands ug Supreme Master sa Philippine Benevolent Missionaries of the Philippines Ruben Ecleo Jr. (SunStar File)
CEBU. Ang kanhi congressman sa Dinagat Islands ug Supreme Master sa Philippine Benevolent Missionaries of the Philippines Ruben Ecleo Jr. (SunStar File)

NADAKPAN sa Huwebes sa kaadlawon, Hulyo 30, 2020 ang dugay nang pinangita dinhi sa Sugbo nga si Philippine Benevolent Missionaries Association (PBMA) Supreme Master ug kanhi kongresista Ruben Ecleo Jr., 60, sa usa ka subdivision sa Balibago, Angeles City, Pampanga.

Si Ecleo gikombikto sa korte sa Dakbayan sa Sugbo niadtong 2012 sa kasong parricide sa pagpatay sa iyang asawa nga si Alona Bacolod niadtong Enero 5, 2002. Apan pagkasikop niya way kalabutan sa parricide, kon di sa kasong graft sa Sandiganbayan.

Ang mga sakop sa Regional Special Operations Group (RSOG) sa National Capital Region Police Office armado og warrant of arrest nga giluwatan ni Justice Efren Dela Cruz sa 1st Division Sandiganbayan sa Quezon City sa kasong Anti Graft and Corrupt Practices Act.

Si Ecleo nagtakuban sa alyas nga Manuel Riberal sa iyang pagtago-tago.

Lakip sa nasikop ang driver nga si Benjie Relacion Fernan, alyas “Smile,” 35, nagpuyo ra usab sa maong lugar.

OPLAN ALMIGHTY

Matod ni Police Major General Debold Sinas, hepe sa National Capital Region Police Office (NCRPO), sukad pa Enero 2020 nagsugod ang ilang pagpangita kang Ecleo, kansang operasyon ilang gitawag og Oplan Almighty.

Nagpadala siya og tawo sa Dinagat Island nga maoy pinuy-anan sa mga Ecleo inabagan sa counterpart nila sa Caraga Region Police Office.

Apan ilang nasuta nga wa na didto nagpuyo si Ecleo kay nibalhin na sa Metro Manila.

Gipasusi ni Sinas ang mga dapit sa kaulohan ug natultolan nila ang suod nga kaila ni Ecleo nga maoy ilang gisunod-sunoran.

Nangita sila og paagi nga makuha ang address.

Ang unang gihatag nga pinuy-anan nahimutang sa Don Antonio Royale Subdivision, Barangay Old Balara, Quezon City.

Didto na nagsugod ang ilang pagsunod-sunod sa tawo ni Ecleo hangtod nga naabot sila sa laing balay sa Batangas.

Apan wa siya didto tungod kay ang mga miyembro lang sa PBMA ang nagpuyo.

Naputol ang surveillance sa dihang gipaubos sa enhanced community quarantine ang tibuok Metro Manila.

Mibalik ang ilang pagpaniid duha ka semana na ang nakalabay human ilang natultolan ang balay niini sa Diamond Subdivision sa Balibago, Angeles City.

Giingong di magsige og gawas si Ecleo, apan nakakuha sila og impormasyon nga siya magduwa og golf uban sa iyang mga kaila.

Tungod sa maong kasayuran, wala na biyai sa tawo ni Sinas ang balay ni Ecleo.

Kagahapon sa kaadlawon. nigawas kini aron moduwa og golf ug dinhi na gihimo ang pagdakop.

“Among gisigurado nga naa siya didto. Two weeks ago, nahibaw-an na namo nga siya. Kaso lang, dili siya mogawas. Nahibaw-an namo nga magdula diay syag golf. Giabangan gyud namo siya nga mogawas. Natayming ganina sa among hinulatay, nigawas siya kay magduwag golf.”

Giangkon ni Sinas nga wa sila mokompyansa tungod sa kadaghang mga miyembro niini sa PBMA nga mosukol sa kapulisan.

Matod ni Police Brigadier General Albert Ignatius Ferro, hepe sa Police Regional Office (PRO) 7, ang pagkasikop ni Ecleo sa mga sakop ni Sinas xdakong accomplishment sa Philippine National Police (PNP).

Ang Criminal Investigation and Detection Group (CIDG) 7 mo-serve usab sa warrant nga giisyu sa korte sa kasong parricide human gikombikto si Ecleo niadtong Abril 14, 2012 sa pagpatay sa iyang asawa.

Ang warrant giluwatan ni Judge Soliver Peras sa Cebu City Regional Trial Court.

Si Peras nipahamtang kang Ecleo og silot nga pagkabilanggo gikan sa 20 ngadto sa 40 ka mga tuig.

Matod ni Police Major Ronald Allan Tolosa, deputy chief sa CIDG 7, nga ang ilang ulohang buhatan nakig-alayon na sa NCRPO labot niini.

Dugang ni Tolosa nga ang CIDG7 wa mohunong sa pagpangita kang Ecleo sukad nalutsan og warrant of arrest sa korte sa siyudad sa Sugbo.

MGA KASO NI ECLEO

Si Ecleo gikombikto sa Sandiganbayan sa tulo ka mga kasong graft nga may kalambigitan dihang siya mayor pa sa San Jose, Dinagat Island gikan sa 1991 ngadto sa 1994.

Kini sa pagpinakas pinaagi sa pagmao-mao sa pagbayad sa usa ka pribadong kontraktor og P2.86 million sa usa ka construction project.

Niapelar si Ecleo apan pulos kini gibasura sa Sandiganbayan hangtod na sa korte Suprema hinungdan nga giluwatan siya sa korte og warrant of arrest. Gisilutan siyang mabilanggo sa kasong graft hangtod sa 31 ka mga tuig.

Hunyo 2002, lima ka buwan human sa kamatayon sa iyang asawa, gisikop si Ecleo sa CIDG 7, diin 22 niya ka mga sakop ang napatay atol sa pinusilay sa lungsod sa San Jose.

Ang pagdakop kaniya gilusad human gipamusil patay sa gituohang mga sakop sa PBMA ang iyang mga ugangan nga silang Elpidio ug Rosalia Bacolod uban sa mga anak niini nga silang Ben ug Evelyn sa balay sa Subangdaku, Dakbayan sa Mandaue sa Hunyo 8, 2002.

Laing sakop sa PBMA member nisulod sa balay ni private prosecutor Arbet Sta. Ana-Yongco sa may dan Sikatuna, Dakbayan sa Sugbo niadtong Oktubre 11, 2004 ug nipusil patay kaniya.

Si Ecleo gitugtan sa korte nga makapyansa og P1 million sa samang tuig tungod sa giingong sakit sa kasingkasing samtang siya gibilanggo sa kanhi Bagong Buhay Rehabilitation Center (BBRC) karon Cebu City Jail.

Apan gikanselar kini niadtong 2012 tungod sa wa niya pagtambong sa mga hearing.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph