NAGTUO ang Sugboanong basketbolista nga si June Mar Fajardo nga importante nga adunay positibong mentalidad karong panahuna labi na nga ang tibuok kalibutan nakigbatok sa pandemiya.
Ang pambato sa San Miguel Beermen miingon nga sa panahon sa iyang pagpaayo sa iyang shin injury nagpabilin lang siyang positibo taliwala sa bati nga mga panghitabo sa kalibutan nga hatod sa coronavirus disease 2019 (Covid-19)
“Kailangan ko lang maging positive (mindset) kahit sa mga nangyayari ngayon na sobrang sama dahil sa krisis na ito,” matod sa lumad nga taga Pinamungajan, Cebu sa interview sa Sports Page.
“Kung tutoosin mo positive mindset lang kasi negative na nga nangyayari sa mundo nato so lalong maging masama,” dugang sa six-time Philippine Basketball Association (PBA) Most Valuable Player.
Matod ni Fajardo gigamit pud niya kining panahuna dili lang sa pagpaayo sa iyang injury, apil sab ang pagpakondisyon og balik sa iyang lawas.
Ang produkto sa University of Cebu (UC) Webmasters nisulod sa PBA niadtong tuig 2012 isip No.1 overall pick sa Petron Blaze Boosters.
Sa unang walo ka mga tuig nga karera sa PBA nakahakot si Fajardo og walo ka PBA titles, tulo ka Finals MVP awards ug unom ka MVP awards.
“Yung inisip ko alang na ito yung tamang time na siguro kailangan ko mag recharge di lang sa injury ko kundi ang buong katawan ko kasi ilang years na ako naglalaro ng basketball,” sigon ni Fajardo.
“Gagamitin ko ang time na to para makapag totally recharge ang katawan ko.”
Niadtong Lunes lang pormal nang gipirmahan sa Games and Amusement Board, Philippine Sports Commission ug Department of Health (DOH) ang Joint Administrative Order (JAO) nga nagtugot sa pagbalik sa professional sports sama sa PBA.
Ang JAO naglatid sa guidelines ug safety measures nga angay sundon sa mga teams ug atleta para makalikay sa coronavirus.
Si Fajardo adunay sagol nga emosyon sa pagbalik na sa unang professional basketball league sa Asia.
“Na-excite na pwede na bumalik sa practice (ang players) at the same time nangangamba din kasi di pa rin totally nawawala ang Covid-19, delikado pa rin. Ayon mix emotions,” pasabot niya.
Misalig si Fajardo nga ang PBA adunay maayo o saktong protocols nga ipatuman alang sa kaluwasan sa mga magduduwa ug tanang nahilambigit sa liga.