PABORITO na ni siya nakong paminawon sa radyo niadtong nagtrabaho pa ko sa Kapitolyo sa Cebu. Unya kalit lang siyang nawala sa kahanginan. Nipauli kuno sa Mindanao.
Duha o tulo ka semana ang nilabay, nakurat ko dihang kalit nakong nadungog ang pamilyar nga tingog ni Baby Nicole sa usa sa mga FM stations sa Dumaguete.
Mga istasyon sa Dumaguete ug Siquijor ra man gyud ang kusog kaayo diri sa habagatan. Dili siya tinuod nga bata. Technically o technologically altered ang iyang tingog pero dunay charm ug medyo intelihente ang iyang mga ipanulti.
Usahay manginsulto siya sa mga manawag pero kataw-anan ang epek. Hangtud sa alas 11 s.b. ra ang iyang Baby Nicole Show. Padayon sa pagsibya, Baby Nicole!
* * *
Nahimuot ug nakapasalamat ko nga sa usa ka miting sa IATF (mga duha ka semana na tingali ang nakalabay) nadungog nako si Presidente Duterte nga naghisgot sa pagpangayo sa tabang Ginuo aron maluwas kita sa pandemya sa Covid-19.
Kadaghan na baya ko makadungog sa Presidente nga nikontra sa mga kadagkoan sa simbahang Katoliko mao nga nanghinaut ko nga mao na ni ang sinugdanan nga mahapsay ang iyang relasyon sa simbahan.
* * *
Seguradong nalipay si Mother Nature ning panahon sa quarantine tungod kay daghang mga tawo nga nibatok sa kapuol sa pagpuyo kanunay sa balay nga panagsa o wala gyuy gawas-gawas pinaagi sa pagpananom og bisan unsa na lang.
Dunay nananom og mga kahoy nga mamunga ug mohatag og landong ug kabugnaw sa palibot. May nananom og mga utanon ug kadtong dunay mga medicinal value sama sa clitoria ternatea (apil ko ani).
Daghan usab ang nananom og mga mamuwak ug kadtong igo rang molabong ug kalit lang nisikat ang snake plant sa lainlaing gidak-on ug matang.
Niadto baya, igo lang agi-agian ang snake plant nga nanubo tipon sa mga sagbot. Makatawa lang ko sa laing ngalan aning snake plant nga mao ang mother-in-law’s tongue.
Ngano kaha? Tungod ba kay talinis kinig tumoy o tungod ba nga morag bitin ang kolor sa uban (mao nga ginganlan kinig snake plant)?
Kon duna moy panahon, hala, pagpanuki-duki kuno mo.
* * *
Nangandoy mo nga makatan-aw na usab og sine sulod gyud sa mangitngit ug bugnaw nga sinehan?
Sige lang. Daghan man kunong gi-andam ang Star Cinema basta molayas na si Tiya Covid.
Hinaut lang nga di kini initan ug pasirad-an.