USA ka hubog nga lalake ang kritikal human natigbasan sa sa iyang silingan, alas 6:30 sa gabii, Hulyo 29, Sitio Center Star, Brgy. Tal-ot, lungsod sa Barili.
Si Marvin Ponsica, 30, minyo ug mag-uuma, nakaangkon og upat ka samad tinigbasan sa lawas.
Ang suspek mao si Antonio Caballes, 54, minyo ug mag-uuma ug silingan ni Ponsica.
Si Police Staff Sgt. Jeffrey Alpas sa Barili Police Station nga nahinabi sa Superbalita Cebu nagkanayon nga si Ponsica hubog kini nga naglakaw sa karsada padulong magkuha sa iyang kabaw nga gitugway.
Si Caballes gikatahong hubog usab kini kay nag-inom uban sa mga higala. Ang duha nagkasugat ug nagkakonprontasi sa ilang daan nga bangi nga nisangko sa pagpanigbas.
Si Ponsica gidali sa pagdala sa mga kabanay sa tambalanan sa Barili apan tungod sa grabing samad, gibalhin sa Vicente Sotto Memorial Medical Center (VSMMC).
Si Caballes mitahan sa ilang mga tanod sa barangay.
Matod ni Police Staff Sgt. Aplas, nga si Caballes naglagot ni Ponsica dihang iyang nasugatan ug nahinumdom siya sa gibuhat niini nga gisumbag siya nga walay igong rason.
Si Caballes nibutyag nga sa miaging semana sa iyang gipatawag sa barangay si Ponsica human siya sumbaga. Ug, sumala sa taho, nagkauliay ang ilang kabubut-on human nag-atubang sa husay sa barangay.
Dihang pulos nahubog ug nagkasugat sa naasoy nga dapit, nanumbalik ang ilang isyu ug nagkaprontasi hangtod nga natigbasan si Ponsica ni Caballes, kinsa gitanggong na sa prisuhan sa lungsod ug nagpaabot sa kaso. (GPL)