NADAWAT dayon sa mga biktima sa sunog didto sa lungsod sa Sulop, Davao del Sur ang tabang nga gipagula sa lokal nga gobyerno.

Sa bag-ong nahuman nga imbestigasyon sa Bureau of Fire Protection (BFP) sa second floor diay sa balay ni Nilda Montecillo nanukad ang kalayo human nibusikad ang plangka sa kuryente niini.

Gikanayon ni SFO1 Orville Semilla, Officer in- charge sa BFP, nga base sa ilang nakuhang mga ebidensya sa lugar, ang plangka sa kuryente ang sinugdanan sa sunog niadtong Sabado sa miaging semana.

Unang niguwa ang taho nga nabiyaang plantsa maoy ugat sa sunog apan gibawi kini sa BFP human nilutaw ang tinuod nga tinubdan sa sunog.

14 ka mga pwesto sa palengke ug duha ka panimalay ang gilamoy sa kalayo apan sayo ning semenaha giingong nadawat na sa mga biktima ang tabang gikan sa munisipyo.

Si Amelia Montellas, pamuno sa Municipal Social Welfare and Development Office, nikanayon nga P5 mil ang nadawat niadtong na-grabehan sa sunog samtang P2 mil sab niadtong mga nag-arkila lang og pwesto sa merkado.

Naningkamot sab nga makabangon dayon ang mga biktima pinaagi sa pagtukod sa ilang panginabuhian sama sa 70 anyos nga si Lola Buena Venturada.

Kini na ang ikapito ug pinakadakong sunog nga nahitabo sa probinsya sa Davao del Sur sukad gisaulog sa BFP ang Fire Prevention Month niadtong bulan sa Marso. (Dondon Dinoy)