HINGPIT nang nangaayo gikan sa coronavirus disease 2019 (Covid-19) ang 32 ka mga binilanggo ug 7 ka officers sa Lapu-Lapu City Jail.
Mao kini ang gibutyag ni Jail Superintendent Jessie Calumpang, ang warden, ug nidason nga Covid-free na ang pasilidad.
Matod ni Calumpang nga sa Hunyo, unang adunay nagkasakit og Covid-19 ug mikatap sa usa ka selda.
Ila kining dali nga gipaubos sa isolation aron kalikayan ang pagkatap sa tibuok pasilidad nga niabot og 38 ka piniriso ug 6 ang unang nakarekober, sumala pa ni Calumpang.
Bugtong pagpatumar og vitamin C ug ehersisyo mao ra ang gihimo sa kadagkoan sa pasilidad aron maulian ang mga binilanggo.
Ang uban kanila nakasinati ug hilanat apan ang uban asymptomatic.
Dugang ni Calumpang, gawas sa mga nakarekober, ang uwahi nilang mga binilanggo nga gidala sa Vicente Sotto Memorial Medical Center (VSMMC) gumikan sa laing balatian apan negatibo usab kini sa Covid-19, susama usab ang mga namatay sa ilang pasilidad ning bag-ohay lang.
“Twenty days jud ni sila gipang-isolate ang kuan ra gyud pahuway, vitamins, personal hygiene ug open ang ilang lugar aron makahanggap ug hangin,” matod ni Calumpang.
Gibutyag ni Calumpang nga bisan kun gipaubos na sa general community quarantine (GCQ) ang Lapu-Lapu, dili gihapon modawat og bisita sa mga binilanggo human gidili man gihapon ang contact ug butangan ang visiting area og plastic barrier.
Mas gipili na lang sa mga binilanggo, matod ni Calumpang, ang pagpahimulos sa E-Dalaw o pinaagi sa video call sanglit dili man gihapon mahimo ang physical contact kung tugotan na ang pagbisita sa pasilidad.
Dunay 100 ka binilanggo ang makapahimulos niini sa buntag ug laing 100 sa hapon sa tingbsita nga adlaw ug ipaagi sa schedule. (GCM)