NANUKAD na ang kapulisan aron ipatuman ang hugot nga seguridad dungan sa pagsaulog sa Semana Santa.

Ang Davao del Sur Provincial Police (DDSPPO) nagmando sa tanang hepe matag kalungsuran nga magpatrolya sa mga kadalanan, ilabi na sa matag simbahan sanglit sugod karong adlawa himuon ang nagkadaiyang aktibidades.

Si Police Senior Superintendent Ronald Dela Rosa, Provincial Police Commander, nagkanayon nga kinahanglang luwas sab ang katawhan og mga motorista gikan sa mga dautang elemento.

Subay sa nakahan-ay nga kalihukan, karong hapon saulogon sa simbahang Katoliko ang misa alang sa seremonyas sa "katapusang panihapon" (Last Supper) sa Ginoo, kun diin gilaumang modagsa ang mga tawo sa mga simbahan.

Samtang sa adlaw'ng Biyernes himuon sab ang Siyete Palabras (7 last words) ni Hesukristo, pagasundan kini sa prosesyon sa Santo Intiero diha sa kadalanan.

Himuon sab karong Sabado, ang pag-bendita sa bag-ong kalayo ug tubig.

Hangtod sa kaadlawon karong Dominggo, wa na'y undang ang kalihukan sa mga simabahan mao nga bantayan kini sa kapulisan.

Hugot sab nga nagpasidaan si Dela Rosa sa mga motorista nga di magpataka og bilin sa ilang mga motor sanglit giingong di moila og Semana Santa ang mga kawatan.

Gawas niini, nagpahimangno sab sila nga di wad-an og tawo ang matag panimalay aron di makawatan.

Bisan ang Digos City Overland Terminal, gibutangan na sab og mga pulis sanglit giingong modagsa ang mga pasahero padong sa nagkadaiyang parte sa isla sa Mindanao aron didto mag-bakasyon.

Sa pikas bahin gisulti sa kapulisan nga nagmalinawon ang tibuok lalawigan atol sa ika-41 nga kasumaran sa mga rebeldeng New People's Army (NPA) niadtong Marso 29.

Apan bisan pa man niini wa gihapon sila mokumpyansa sanglit giingong di sab moila sa balaang adlaw ang mga rebelde. (Orlando B. Dinoy)