USA ka ginang ang mipatala sa kapulisan human siya gitulis sa wa mailhing suspetsado nga armado og icepick didto sa dalang Quirino, Barangay Sto. Ni¤o, siyudad sa Panabo.
Giila ang biktima nga mao si Lourdes Lawas 28, molupyo sa Quezon Street, Barangay Sto. Ni¤o sa maong siyudad.
Sa report gikan Panabo City Police Station nasayran nga pasado alas 11:00 sa gabii niadtong Martes nagbaktas ang biktima sa maong dalan.
Kalit nga miduol ngadto kaniya ang duha ka wa mailhing mga lalaki, sa way paglangan gitionan siya ice pick, mideklara og tulis.
Sa kahadlok nga pasakitan sa mga suspek, napugos ang biktima sa pagtugyan sa iyang mahalong cellphone ngadto sa mga suspetsado.
Human makuha ang tuyo, mga suspek dayong misibat padulong sa wa matino nga lugar.
Ang biktima igo na lamang sa pagdangop ngadto sa presinto sa kapulisan.
Mga sakop sa Panabo CPS mihimo na karon og dugang pakisusi sa hitabo. (Marvin Pineda)