ANG buhatan sa kapulisan sa dakbayan sa Panabo mipatuman karon sa hugot nga seguridad atol sa paghinumdum sa Semana Santa.
Sumala kang P/Supt. Alexander Serano, hepe sa Panabo City Police Station, nga naka-deploy na karon ang tanang pwersa sa kapulisan palibot sa siyudad sa Panabo hilabina sa mga simbahan, mga matawong lugar nga ginaduaw sa mga debotong Katoliko alang sa mahal nga adlaw.
"Atong gipatuman karon ang hightened security tibuok Panabo City to ensure nga way mga kagubot ug kadaut nga mahitabo," sulti ni Serano sa pakighinabi kaniya sa Superbalita.
Gisulti ni Serano nga 24-oras gyud nga nakabantay ang kapulisan sa maong siyudad.
Wa sab silay bakasyon aron mabantayan lamang ang katawhan nga makigduyog sa kasaulugan.
Kaabag sa kapulisan sa pagbantay sa palibot ang mga force multipliers sama sa barangay tanod, barangay pulis ug mga sakop sa Panabo City Police Auxilliary Group (PCPAG).
Lakip sab nga gibantayan sa kapulisan ang mga terminals tungod sa mga pasahero nga modagsa aron nga mobakasyon.
Ang terminal sa Panabo agianan kini sa mga pampasaheroang bus nga gikan sa dakbayan sa Davao pagawas sa rehiyon onse ug pabalik.
Ang usa sab ka platoon sa 1108th Police Provincial Mobile Group nga nakabase sa siyudad sa Panabo ang nakabantay sab sa palibot nga kaabag sa PCPS.
Samtang sa dakbayan sa Tagum, alerto sab ang tanang pwersa sa kapulisan aron bantayan ang tulo ka mga dagkung simbahan sa nahisgutang siyudad.
Ang Christ the King Cathedral sa dakbayan sa Tagum naila sab kini nga ginadagsa sa mga debotong Katoliko nga gikan pa sa ubang lugar tungod sa usa ka sikat, dakung replika sa rosaryohan nga gibutang sa maong simbahan. (Marvin Pineda)