KIDAPAWAN CITY -- Misaka pa ang ihap sa natala nga mga kaso sa dengue sa probinsiya sa North Cotabato.
Sa ulahi nga talaan sa Integrated Provincial Health Office (IPHO) anaa na sa 892 dengue cases ang natala sa probinsiya sa 18 ka mga lungsod.
Nag-una niini ang Makilala nga dunay 170 kaso, Kidapawan City (92), Matalam (81), Libungan (60), Aleosan (58), Midsayap, (54), M'lang (50), Arakan (47), Pikit (46), Pigcawayan, (46), Alamada (42), Tulunan (40), Kabakan (39), Pres. Roxas (20), Magpet (16), Antipas (15), Banisilan (11) ug Carmen (5).
Matud ni IPHO-Cotabato Chief Dr. Eva Rabaya nga nagpadayon ang ilang gihimong lakang nga masumpo ang mga lamok nga nagdala sa kagaw sa dengue.
Nagpahigayon og pagbungkag ang IPHO sa mga breeding sites niini sa Makilala ug Matalam.
Gawas niini, nanghatag sab sila og NS1 Dengue kits sa tanan nga lungsod ug siyudad sa probinsiya; technical support sa mga fogging operations sa Makilala, Pikit, Kabacan ug Alamada; coaching and mentoring for indoor residual spraying sa Libungan; ug fogging and operation kulob.
Nagpasidaan si Rabaya sa katawhan sa pagsunod sa 4s Strategy – "Search and destroy, Self-protection measures, Seek early consultation" ug "Say no to indiscriminate fogging" aron maprotektahan ang kaugalingon batok sa sakit nga dengue.