TINGKAGOL karon sa prisohan ang duha ka pusher human sila masikop sa operatiba sa Sta. Ana Police Station alas 7:05 sa gabii niadtong Huwebes, Hulyo 30, 2020, didto sa Ponce Street, Barangay 28-C, Poblacion Davao City.
Mga suspek giila sa kapulisan sa Sta. Ana Philippine National Police nga sila Nenito Dinar Bustamante, alyas Lito, 36, car wash boy, taga Barangay 76-A, ug ang kauban niini nga si alyas Kang-Kang, 30, taga Barangay Leon Garcia.
Arestado sab sa San Pedro Police Station ang usa sab ka online seller nga si alyas Gaga, human masikop sa Barangay 76-A Biyernes sa kaadlawon.
Samtang nalit-ag sab sa operatiba sa Sta. Ana Police Station ang tulo pa ka mga drug personality kinsa anaa sa Top 10 sa drug watchlist sa Regional level sa Police Regional Office (PRO-Davao).
Sa usa ka hiniusang puwersa sa awtoridad nasikop ang tulo alas 12:05 sa tungang gabii, Hulyo 31, didto sa Block 92, Purok 7, Barangay 21-C, Davao City.
Mga suspek giila sa kapulisan nga sila Welbert Mariaca Miasis, 19-anyos, taga Barangay 21-C; Danny Acalal Sabdani, 31-anyos, construction worker, nagpuyo sa Barangay 23-C ug usa ka Michael Asamudin Sabani, taga Purok 7-A, Barangay 23-C, Isla Verde, Davao City.
Mokantidad sa P24,000 sa gituohang shabu ang nakuha sa posisyon sa tulo ka mga dinakpan.
Giandam na ang kaso nga ipasaka sa mga dinakpan didto sa korte.