USA ka pamilya ang nilanding sa balay tambalanan human nabangga ang gisakyang motorsiklo kagahapon mga alas 4:15 sa hapon sa Indahag ning siyudad sa Cagayan de Oro.
Naangol ang amahan nga mao si Danny Limbaga, 32, asawang si Erlyn, 32, duha ka mga anak nga mao si Danilyn, 3 ug Dan Lester, 7.
Apil sa nadisgrasya ang duha ka mga silingan nga niangkas sa motorsiklo nga mao sila si Jane Cabonillanda, 36, minyo ug anak niining si Nelgie, 7.
Si Rosa kinsa nagpailang silingan ug higala sa mga biktima nibutyag sa interbyu sa Sun.Star Superbalita nga unom ka mga tawo ang sakay sa usa motorsiklo niadtong tungora nga gimaneho ni Danny nga posibleng hinungdan nga nawad-an og balanse.
Gikan pa ang mga biktima nitambong sa graduation sa laing usa ka anak niini kinsa nagpabilin pa sa tunghaan niadtong tungora dihang pauli sa puloy-anan nahitabo ang aksidente.
Natabo sa motorsiklo ang usa ka multicab ug dihang nilikay sa dalan maayong pagkadigyas sa motorsiklo hinungdan sa pagkabalintong niini.
Tungod sa kakusog sa dagan nilagpot ang mga sakay sa motorsiklo ug nahulog.
Pulos nabun-og ang mga biktima ug samaran ang mga nawong niini.
Si Cabonillada niadtong tungora nag-hitch lamang sa pamilyang Limbaga human niuban sa pagpanan-aw sa graduation.
Tungod sa mga naangkon sa biktima gipangdala kini sa Northern Mindanao Medical Center (NMMC).
Matud ni Rosa nga usa ka gituohang hinungdan sa pagkaligid sa motorsiklo mao ang kadaghan sa nisakay niini.
Sa pagsulat ning balita nagpabilin nga nagpaalim sa ilang mga samad ang tibuok pamilya sulod sa NMMC apan luwas na sa makuyawng kahimtang.