SAMTANG nangandam ang kapolisan, gisiguro usab sa mga driver sa pasaherong mga bus ang luwas nga pagbiyahe ug dili malangan nga mga pasahero human namatikdan ang pagpunsisok sa mga pasahero sa mga terminal.

Atol sa gihimong pakisusi sa Sun.Star Superbalita sa Agora bus terminal ning siyudad sa Cagayan de Oro namatikdan na ang kadaghan sa mga pasahero ug gituohang modaghan pa labina nga wala nay trabaho sa gobyerno ug halfday na lang kagahapong adlawa ang pipila ka mga trabahante sa pribado.

Si Ruel, driver sa Rural Transit Mindanao Inc., nagbiyahian paingon sa Bukidnon nibutyag sa Sun.Star Superbalita nga mas gipalawom ug mas nahimong mabinantayon sila uban sa konduktor niini.

Gisiguro niini nga maayo ang kondisyon sa gimanehong bus aron dili madaotan taliwala sa biyahe ug saktong mahatod ang pasahero sa gipadulngan.

Giaghat usab ang mga pasahero sa pagmabinantayon sa ilang mga tupad aron malikayan ang mga dautang hitabo susama niadtong nilabayng bulan diin usa ka bus ang biktima sa pagpanulis.

"Usa gyod na sa among gibantayan nga dili kita masakyan sa mga tulisan kay apil man atong pasahero biktimahon," ni Ruel.

Gihinaot niini nga dili na mausab ang maong insidente.

Samtang sa laing bahin namatikdan na ang pipila ka mga sakop sa Police Station 3 (PS3) pangulohan ni P/Insp. Wilyn Rojo nga naglibot suroy sa Agora terminal, pipila usab kanila wala nagsul-ob sa uniporme.

Samtang ubay-ubay ka mga polis ang gipakatap sa tibuok siyudad aron pagsiguro sa malinawon nga kasaulogan sa Mahal nga Adlaw.