Cabahug mibiya sa UV Lancers

NAKUHAAN ang pwersa sa University of the Visayas (UV) Green Lancers human ang ilang All-Star forward nga si Jancork Cabahug nakahukom nga mobalhin sa University of the Philippines (UP) Fighting Maroons sa Manila.

Si Cabahug maoy usa sa mga pambato sa Green Lancers sa Cebu Schools Athletic Association Inc. (Cesafi) ug nakatabang kini sa ilang pagsakmit sa men’s title niadtong 2017 ug 2018.

Ang 6-foot-3 miagak usab sa Green Lancers ngadto sa ikaduhang puwesto sa Philippine Collegiate Champions League (PCCL) niadtong 2018.

Si Cabahug, 21, nagpasalamat sa iyang kasinatian sa sulod pito ka mga tuig sa UV.

Nagsugod iyang karera sa Cesafi sa high school level ug nahimong pambato sa collegiate team.

“Opportunity was presented to me. It’s a chance to play and gain new experience in different league,” matod ni Cabahug, ang ikaupat nga hinirasyon sa Cabahug clan nga nisidlak sa Cebu basketball.

Sa iyang pagsulod sa Fighting Maroons, himuong inspirasyon ni Cabahug ang kanhi UV stars Paul Desiderio ug Jun Manzo nga mikulit og pangalan alang sa Fighting Maroons sa University Athletic Association of the Philippines (UAAP).

Ang Fighting Maroons usa sa mga title-contenders sa UAAP nga adunay lawon nga lineup gipangulohan nila kanhi UAAP Most Valuable Player Bright Akhuetie ug local stars Kobe Paras and Ricci Rivero.

Anaa pud sa team ang mga Sugbuanong si Cesafi Mythical Five member Conrad Catapusan ug Pio Longa.

“I am also very comfortable with the coaching staff and the players, since most of them know how to speak Bisaya, especially the head coach, Bo Perasol,” matod ni Cabahug. / (RSC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph