Teen Romance: Look out for another
(Katapusan sa pito ka mga gula)
Sa akong pamatyag sa akong kaugalingon, morag misugwak sa akong dughan ang grabeng kaluoy nga gibati nako ngadto kang Ronnel. Unya, nakatan-aw ko kaniya bisan nagtalikod siya nako. Morag naghilak siya kay nauyog man ang iyang mga abaga.
Misulod ang pari sa altar. Mitindog ko. Mitindog sab si Ronnel. Nagpamahid siya sa iyang mga mata sa gikuptan niyang panyo. Wa na nuon mahimutang ang ajkong kaugalingon, wa na nuon masulod sa akong hunahuna ang gimisa sa pari. Ang akong hunahuna didto na lamang kang Ronnel. Miabot ang punto sa pagbinatiay. Milingi si Ronnel ug nakalitan siya pagkakita nako nga diha sa iyang luyo.
“Peace be with you.”
Hinay kong sulti.
“Peace be with you.”
Mibawos sab sa pagsulti si Ronnel nako. Pagkahuman sa Misa, nagkuyog mi si Ronnel sa paggawas sa simbahan. Walking distance lang ang among gipuy-an. Sa tan-aw nako kang Ronnel malipayon siya. Ug nahibulong ko sa akong kauglaingon kay first time nga mibati ko og tinud-anay nga kalipay sa among panagkuyog karon ni Ronnel.
“Puwedeng mamisita nimo unyang gabii, Joan?”
“Sige. Di man kaha ka magpakugos sa didto sa among sala.” Nagkinataw-anay mi si Ronnel.
“Duna koy itug-an nimo, Ronnel. Misalig ko nimo nga di kini nimo ipanabi.”
“Unsa man, Joan?”
“Si Gabriel ba.”
Ug gisultihan ko si Ronnel bahin ni Gabriel. Nahibulong ko kay mikatawa siya og kusog.
“Naunsa ka diha, Ronnel, nga mikatawa man pag-ayo?”
“Dugay na kong nakahibawo nga bayot si Gabriel, uy, Joan. Sultihan tika sa tinuod, nangulitawo siya nako. Puwerte kuno niyang iboga nako.”
Nakatan-aw kog dugay ni Ronnel. Nag-smile siyang nako. Nakapanglingo na lang ko. Wa gyud koy kasayoran nga duna diay gusto si Gabriel kang Ronnel.
Anang pagka gabii, duna nay desisyon nga akong nakab-ot. Sayo nga nahiabot si Ronnel. Mao pa say pagkahuman nakog panihapon uban sa akong mga ginikanan ug duha ka manghod.
“Kanindot sa akong paminaw sa akong kasingkasing karon, Joan. Na, sultihan tikag usab, dako kaayo ang love ko nimo.”
“Ronnel, nganong mangita pa man diay ko og laing laki nga naa ka man?”
Wa ko kasupak dihang mikupot si Ronnel sa akong kamot. (KATAPUSAN)