2 ka poste tumba sa container van


WIRES NABITIK: Ang dan J.P. Rizal, North Road sa Barangay Jagobiao, Mandaue City trapik kaayo kagahapon, Biyernes, Hulyo 31, sa alas 11:30 sa buntag tungod sa duha ka ma poste nga natumba human nasangit sa container van ang wire nga nilatas sa ibabw sa karsada. / Traffic Enforcement Agency of Mandaue
WIRES NABITIK: Ang dan J.P. Rizal, North Road sa Barangay Jagobiao, Mandaue City trapik kaayo kagahapon, Biyernes, Hulyo 31, sa alas 11:30 sa buntag tungod sa duha ka ma poste nga natumba human nasangit sa container van ang wire nga nilatas sa ibabw sa karsada. / Traffic Enforcement Agency of Mandaue

DUHA ka mga poste ug 20-footer container van natumba human mabitik ang van sa mga wire sa kuryente sa dan J.P. Rizal, North Road Barangay Jagobiao, dakbayan sa Mandaue, Biyernes, Hulyo 31, 2020 alas 11:30 sa buntag.

Ang disgrasya niresulta sa grabeng huot sa dagan sa trapiko paingon sa amihanan sa Sugbo ug pabalik sa Mandaue tungod sa usa ka ka lane lang ang maagian.

Matod ni Arnold Malig-on, ang operations chief sa Traffic Enforcement Agency of Mandaue (Team), nga human madawat ang alarma dali silang miresponde kauban ang taga City Disaster Risk Reduction Management Office (CDRRMO).

Nagdala ang mga kawani sa CDRRMO og mga gamit aron pagputol sa mga kahoy nga natumba tungod nabitik sab sa wire sa mga natumba nga poste samtang nagpaabot sa kawani sa Visayan Electric Company.

Samtang ang mga kawani sa Team mao ang nagpull-out sa 20-footer container van nga nahulog gikan sa truck.

Sigon ni Malig-on nga nabira ang truck alas dos na sa hapon samtang ang mga kawani sa Visayan Electric padayon gihapon sa pagkuha sa natumbang poste sukad alas 12:30 sa udto.

Mapasalamaton si Malig-on nga walay naangol nga sibilyan sa maong disgrasya gani ang drayber sa truck wala ra kini naunsa tungod ang container van lang ang natumba og dili ang tibuok truck.

Matod ni Malig-on nga ang truck paingon unta sa amihanang bahin sa Sugbo apan nabitik kini sa wire sa poste.

Usa sa poste gama lang sa kahoy samtang ang usa kongkreto ug nagtupad kini ang duha nga maoy nakabitik sa van.

Sigon ni Malig-on nga daghan na silang nadawat nga taho nga ang maong wire sa poste daan na nga nagharang.

Gani mismo si Malig-on na ang miadto sa Visayan Electric aron ipaayo ang maong mga wire duha ka semana ang milabay atol sa pag-roving niya sa lugar.

Apan, sigon ni Malig-on nga tungod sa uwan uwan hinungdan nga wala kini malihok ug naabtan na sa disgrasya.

Ang plano sa Visayan Electric nga ilisan ang mga poste. (KFD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph