GISUBLI ni Cebu Governor Gwendolyn Garcia pagsulti nga ang tumong ug tuyo sa pagbukas sa turismo mao ang pagpabangon sa nalukapa nga ekonomiya sa Lalawigan sa Sugbo epekto sa coronavirus disease (Covid-19) pandemic.
Kini iyang giluwatan atol sa gipahigayon nga re-opening sa tourism activity sa habagatan nga bahin sa Sugbo.
Sa Biyernes, Hulyo 31, gibuksan pag usab ang labing unang tourism activity nga mao ang whale shark watching sa Barangay Tan-awan, lungsod sa Oslob.
Kauban ang Provincial Tourism Task Force (PTTF), Mayor Jose Tumulak sa Oslob, Mayor Jeffrey Belciña sa Dalaguete, Bokal Jose Mari Salvador, gipangulohan ni Garcia ang pagsusi sa mga whale shark sa lugar.
Kon kaniadto moabot og 2,000 ka mga turista ang modagsa sa Oslob matag adlaw, apan tungod sa hulga sa Covid-19, gilimitahan lang sa 1,000 ka mga turista matag adlaw ang mahimong makasuroy.
Subay sa paglusad sa Lalawigan isip “health and wellness destination”, ang tanan nga resorts ug tourism activities kinahanglan nga mahisubay sa standard health protocol.
Kini sama sa pagpamalit og disinfecting equipment ug uban pa nga kagamitan nga maseguro ang pagpugong sa pagkatap sa kagaw.
Pagpamutang og mga ali sa customer service area o counters, pagbutang og mga alcohol ug sanitizers, pagsul-ob og facemask ug face shield.
Gipahinumdoman usab ang tanan nga bangka operators sa pag sul-ob og life vest ug pag disinfect sa sakayan matag human og gamit sa mga mosakay nga turista.
Alang sa mga mag snorkeling aron sa pagtan-aw sa mga butanding, di na tugotan nga magpuli-puli sa mouthpiece ug diving tubes.
Gikinahanglan nga magdala og kaugalingon o ba kaha mopalit og ekipo sa tindahan nga giandam sa lugar.
Tungod kay ang gitugot mao lang ang 50 porsyento nga kapasidad sa tanan nga mga resort ug tourism activities, kinahanglan nga magparehistro o mopalista daan sa portal o website sa Probinsya.
Karon, Agusto 1, modawat na og kustomer ang Lungsod sa Oslob.
DIVING, ISLAND HOPPPING
Samtang ilusad usab karong adlawa, Agusto 1, ang diving ug island hopping activities sa lungsod sa Moalboal diin gipasigarbo ang maanindot nga kadagatan kon asa makita ang nagkalain-lain nga mga marine animal.
Gipahibawo ni Garcia nga bisan kon gipaubos sa general community quarantine (GCQ) ang status sa dakbayan sa Sugbo, padayon nga mopahugot ang Probinsya sa mga agianan niini.
Buot pasabot nga aduna gihapoy checkpoints sa matag lungsod ug barangay nga maagian.
Hinuon alang sa mga Sugboanon sa probinsya nga mosuroy sa mga tourist destinations giawhag nga likayan ang pag-agi sa dakbayan sa Sugbo.
“Di man ta pareha gihapon og classification kay kon ma-GCQ ang Cebu City, MGCQ man ang Province. So, we’d rather nga hinay-hinay sa ta kay nakahinumdom mo adtong na GCQ ang Province, GCQ
ang Cebu City, unya atong giablihan ang borders nato, diha ni-shoot up ang atong (Covid-19) positives,” pagpasabot sa gobernador.