PAMPANGA

Garcia: Ding Mabibye king Kalaraman (Those Who Live by Lies)

Kapisik

“Ken kang ibpa mu, ing dyablu, at buri mu lang tupdan ding kapagnasan ning ibpa mu.

Makamate neng sarya kanita pang kamumulan, e ya kakalawat king katutwan, uling alang katutwan kaya. Kabud maglaram ya, ing amanu nung tibwan na yang gagamitan na, uling malaram ya at ya ing ibpa ning kalaraman.”

Wan|Dangka 8: Sunis 44

(John 8:44)

“E yu pabustan lulwal karing asbuk yu ing e manayun a pamangamanu, nung e nung sanu mung ing makasaup bang patatagan la ring aliwa agpang king pamangaylangan da, bang’ting upayang asopan la ring makirandam.”

Episyanu|Dangka 4: Sunis 29

(Ephesians 4:29)

“E la dapat mali; e la sumabing kalaraman.

Ing mapamirayit a dila e la mayakit karing asbuk da.

Mangan la’t magkera at alang makapamatakut karela.”

Sepanaya|Dangka 3: Sunis13

(Zephaniah 3:13)

“Sadya kayung lalakad karing paralan a deni, king bye misan yu nang delanan.

Dapot ngeni ilako yu la naman deni karing sarili yu:

Kamwa, kapalyan lub, kanawangan, pamanyirang parang tau, at marinat a amanu karing labi yu.

E ko mipaglaram king balang metung, uli namang likas yu na ing luma yung sarili pati na ring gawi yu.”

Kolosyanu|Dangka 3: Sunis 7-9

(Colossians 3:7-9)

“E kayu mangalat e tutung balita. e ye susopan ing mikasalang tau kapamilatan ning masagwang pamanyaksi.

E yu la tataukyan ding malda king maling dapat.

Ampat mamye kayung patutu king daluman e yu ipapakarok ing katalarwan kapamilatan ning pamangampi karing malda, e ko papakit pamangabiran king pakakalulung tau king daluman.

E yu lilingad ing katalarwan karing malukang tau king daluman.

E kayu magkyalam king maling pamanyumbat at e ye kakana ing alang sala o tapat a tau king kamatayan, uling e Ku la patawaran ding mikasala.

E kayu tatanggap sulsul, uling ing sulsul bubulagan da la ring manakit at babaluktut da ing labwad ding alang sala.”

Pamaglikas ding Malda|Dangka 23: Sunis 1-3/6-8

(Exodus 23: 1-3/6-8)

Ing pamaglaram makasugung king maling kapanwalan o king alang kapanwalan a ing Apung Ginu balu na ngan ing daraptan tamu at pati na isipan tamu pa, ding sasabyan a pabulung, dapat a pasalikut, at pagnasan karing pusu tamu. Dakal kekatamu ing e ta na agaganaka ing katutwang ini inya sa’t dakal lang maglaram at mamirayit.

Keraklan kareng mapaglaram mayna la kapanaligan king Apung Ginu o mekad ala a mang kapanaligan at iti yang mamye sikanan lub para karela king daraptan dang kalaraman at kapamiraytan. Dapot agyang ala yang masasabing kapanaligan king Dyos ing tau--ati yu pa mu rin ing pilubluban a pagsantungan ning Apung Ginu anting Ginu kilub ding pusu tamu.

Agyang anak yang malati o bingut ya pa, kabud makagawa yang e makatud, damdaman na na king pusu na a atin yang depatan a e makatud o kasalanan inya sa’t kumarug ya salu nung malyari ita kaya. Keraklan o bitasa a denasan ta na ngan ita o ing pamangarug salu kabud makagawa tamung mali o makakarok kareng aliwang mabibye.

Ating taung mabibye king kalaraman at kapamiraytan. Deti–nung damdaman da man ing pilubluban dang e mamayun king dapat da–mepata na la at e da na lingunan mann iti. Ibalaus da’t ibalaus ing pamaglaram agyang balu da e tutu ing sasabyan da. Panakitan da pa iti at ing kalaraman o kapamiraytan yang gagamitan dang pagkabye.

Ing sakit, agyang matukal na la king depatan da, e da aminan ing gewa da nanan mo mang payaminan. Kasi ala nang talab karela ing gulasyo ning pilubluban at diwa da. Pata na la.

=====

Dake Talabaldugan:

liyád (panguri) likad; makasubung salu, makaurung buldit. English - when body is bent backwards with stomach protruding. Alimbawa king pamangamit: “Liyad ya katawan neng pupulayi ya i Kiku bang kanita kanu lalu yang bibilis uling tutuki neng masalese nig angin.”

liyág (palagyu) palsintan, pakamalan, sinta, makamal. English - beloved, darling, dear, dearest, sweetheart. Alimbawa king pamangamit: “Anggang kapilan ne kaya ituring liyag ning metung at metung a mipalsinta kabang bye ra o kaba mung anak la?”

liyáp (palagyu) lyap, kalyapan, labuyu o mala-labuyu. English - untamedness, being not domesticated, being wild, savegeness, being feral, wilding. Alimbawa king pamangamit: “Ala nang sumambut pa keng liyap ning itu a lapa-lapasak king libutad ning ligawan a malaput at maburak.”

liyás (panguri) lyas; ebun ding kutu kareng buntuk da reng tau. English - nit, egg of louse. Alimbawa king pamangamit: “E do agisan-gisan ilako deng liyas nang Osang agyang miglanya neng asna kabinit ampong mindilu neng aslam napun.”

======

SADYANG GAWI DA RENG KAPAMPANGAN

INYANG magaral kami keng grade school, atin keng talaturu a maigpit keng panugali at ing metung a e na pekaburi ya pi ing pamaglaram. Apanwala na kami a balu no reng maglaram nung talanan na la pulsu at kabud abalu nang maglaram ya ing anak–isila ne o nung sari kabayat ing kalaramann a gewa na o e na pa mu rin buring aminan agyang mebante ne–isila neng makayagpa at ating aklat kareng adwa nang gamat.

Kayari pin naman, ala nang maglaram uling e la bisang misila at mangapakarine deng anak. King kasalungsungan milako ya keng tuturu da ing GMRC o Mayap a Gawi at Makatud a Dapat. Sana ibalik de at mipatupad yang masalese.

======

PIGAMPA: Ing Kapisik manalig yang misubling pasibayu ing lagablab ning legwan ning Kapampangan kapamilatan ning pamipasigla king keyang Kalinangan—ding keyang dalit, kawatasan, amlat at miyayaliwang kapaglalangan.

PARASAN: Pagnasan na niting ing paralan ning panyulat at sablang dake ning Kalinangan tamu a telukyan ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph