NAKATALA og upat ka mga bag-ong kaso sa coronavirus disease (Covid-19) ang Cagayan de Oro human nagpositibo ang resulta sa swab test sa duha ka close contacts sa ika-123 nga kaso ug duha ka returning overseas Filipino workers (ROFs).
Sa pagkakaron, anaa na sa 148 ang kinatibuk-ang kumpirmadong kaso sa Covid-19 sa dakbayan.
Ang ika-145 nga kaso usa 50-anyos nga babaye nga residente sa Barangay Macasandig. Gi-swab siya kaniadtong Hulyo 29 ug positibo ang resulta nga nigawas niadtong Hulyo 31, 2020.
Siya karon nagpabilin sa Temporary Treatment and Monitoring Facility.
Matud ni City Health Office Epidemiologist Dr. Joselito Retuya nga ila nang nahikling pipila ka mga close family contacts sa babaye ug gitambagan sila nga mag-quarantine.
Ang ika-146 nga kaso usa ka 31-anyos nga lalake nga residente sa Barangay Macasandig. Wala siyay travel history ug usa sya ka asymptomatic.
Ang lalaki gi-swab Hulyo 29 ug ang resulta migawas nga positibo Hulyo 31. Siya karon nagpabilin sa Temporary Treatment and Monitoring Facility.
Ang ika-145 ug ika-146 nga mga kaso mao ang mga close contacts sa ika-123 nga kaso, kinsa usa 48-anyos nga lalaki nga Authorized Person Outside Residence (APOR) ug residente pud sa Barangay Macasandig.
Matud ni Retuya, ang ika-123 nga kaso nagkonsulta sa usa ka pribado nga doktor duha ka adlaw pagkahuman sa iyang pag-abot sa balay.
Upat o lima ka adlaw sa iyang pag-abut sa balay, gitambagan ang lalaki nga magpa-swab. Gi-swab siya kaniadtong Hulyo 21 ug positibo ang resulta sa Hulyo 22.
"Wala ta naghimo og focused containment kay ato namang nahikling ang iyang pamilya nga karon nakita nato nga naa sila sa CIU (city isolation unit)," ingon ni Retuya.
Ang ika-145 ug ika-146 nga mga kaso usa sa mga close contacts nga gidala sa city isolation unit human ang ika-123 nga kaso nag-positibo sa virus.
Ang ika-147 nga kaso usa ka 27-anyos nga lalaki nga ROF gikan sa Middle East ug residente sa Macanhan, Barangay Carmen. Miabot siya Hulyo 17 sa Manila diin siya gi-swab ug negatibo ang resulta.
Matud ni Retuya nga nakaagi siya og quarantine sa usa ka hotel sa Manila gikan Hulyo 17 hangtod sa Hulyo 22. Miabot siya sa Cagayan de Oro Hulyo 23 ug gi-swab Hulyo 29. Migawas nga positibo ang resulta Hulyo 31.
Ang 27-anyos nga lalaki asymptomatic ug wala’y nahibal-an nga comorbidity. Siya karon nagpabilin sa Temporary Treatment and Monitoring Facility.
Ang ika-148 nga kaso usa ka 52-anyos nga lalaki nga ROF gikan sa Middle East ug residente sa Macanhan, Barangay Carmen. Miabot siya sa Manila Hulyo 16 diin siya gi-swab ug negatibo ang resulta.
Ang lalaki miagi og kwarentina sa usa ka hotel sa Makati City gikan Hulyo 16 hangtod Hulyo 21. Miabot siya sa Cagayan de Oro Hulyo 22 ug gi-swab Hulyo 29. Ang resulta migawas nga positibo Hulyo 31.
Siya asymptomatic ug karon nagpabilin sa Temporary Treatment and Monitoring Facility.
Usa ka pasyente nga positibo sa Covid-19 ang gi-tag nga recovered human kini nagnegatibo sa iyang ikaduha nga swab test.
Sa pagkakaron ang kinatibuk-ang recovered nga pasyente sa Covid-19 sa Cagayan de Oro anaa na sa 85.
Ang naka-recover usa ka 21-anyos nga babaye nga locally stranded individual (LSI) gikan sa Manila ug residente sa Barangay 26.
Samtang, giingon usab ni Retuya nga ang focused containment nga gipatuman sa Barangay 35 gilibkas Sabado, Agosto 1.