ENERO 19, 2019, ang usa sa mga petsa nga dili makalimtan sa magtiayon nga sila si April Ma. Sato-Lagaras ug Jerreyme Lagaras.
Sa maong adlaw, ni-propose si Jerreyme ngadto kang April.
Way ideya si April nga aduna na diay nakaandam nga plano ang lalake sa iyang gipakita nga slide show ngadto niya.
Sa slide show, tagsatagsa nga gipakita ni Jerreyme ang ilang mga hulagway ni April sud sa walo ka tuig nila nga relasyon.
“Sa kadaghan sa mga slide show nga among gitan-aw ,mao na diay to,” asoy sa 26 anyos nga bride.
Human sa katapusang hulagway, gihatag ni Jerreyme ang usa ka singsing ngadto kang April ug gipangutana, “will you marry me?”. Nipasiaw pa og tubag si April ug nagginaksanay sila human masul-ob ang singsing.
Paglabay sa kapin usa ka tuig o niadtong Hulyo 21, ang duha nabugkos pinaagi sa civil wedding nga gipangulohan ni Carcar City Mayor Mercedita Apura.
Nahitabo kini duha ka adlaw sa dili pa ang ilang 9th anniversary sa ilang panag-uyab.
Niadtong 2011, dihang una silang nagkaila.
Ang ig-agaw ni April maoy nagsilbing tulay sa duha. Si Jerreyme nangayo sa cellphone number sa babaye ug ni-text kini og quote nga mensahe niini.
Wa dayon mo-reply si April. Apan human sa usa ka semana, gitawgan ni April si Jerreyme ug dinhi nagsugod ang ilang komunikasyon.
Human sa duha ka buwan nga nagteksanay, nagkasabot sila nga magkita sa personal ug human, nagkauyab ang duha.
Niadtong June 27, 2020 unta ang skedyul sa kasal nilang duha sa St. Catherine of Catherine of Alexandria Church sa siyudad sa Carcar. Apan tungod sa community quarantine nga gipatuman sa gobiyerno, nasibog kini ngadto sa sunod tuig.
Ang pagkamasinabtanon, buotan ug way bisyo ni Jerreyme ang mga kinaiya nga nagustohan ni April samtang ang pagkabuotan ug pagkamasinabtanon usab ni April ang nauyonan sa bana.
“Never na on and off among relationship. Wa sad mi third party issue. Magkasinabot mi and same mi og interest...My happiness ang among endearment,” dugang sa 26 anyos nga asawa.
Si April nagtrabaho isip disbursing officer sa Department of Education sa Carcar City Division samtang usa ka software quality engineer sa usa ka pribadong kompaniya ang iyang 32 anyos nga bana. (SCG)