DAGHAN baya sab gyud ang naukay sa dihang may nakitang mga litrato nilang Alden Richards ug Bea Alonzo sa social media.
Nakahunahuna usab dayon ang uban nga may buhaton nga pelikula ang duha.
Mao siguro ni ang sunod nga proyekto nga makauban ni Alden human ni Kathryn Bernardo si Bea Alonzo sa Star Cinema.
Pero kining tanan nga balita gikalipay usab og maayo sa mga fans sa duha apan ang pangutana naa ug madayon ba kaha kini?
Kon wala ko masayop. unang nagkita sila si Alden ug Bea sa airport sa Thailand ug miangkon pa gani si Alden nga starstruck siya sa dalaga.
Misugilon pa kini nga usa si Bea sa gusto niyang mahimong leading lady sa umaabot niining mga pelikula.
Karon nga may nanggawas na usab nga mga pictures nila misamot ang mga paglaum sa uban nga madayon kini.
Tinuod nga may ubanan nga proyekto si Bea ug Alden karon, sa atong nahibaw-an pareho silang gikuha nga endorser.
Sa pelikula usab siguro ato na lang paabuton kay pareho man sab sila nga ganahan mag-uban sa usa ka film project, Ay'g Saba!
* * *
Natapos na diay nako og tan-aw ang original series sa iWant nga "Beauty Queens" ug nalingaw sab ko sa dagan sa ilang istorya.
Usa diay si Lotlot de Leon nga bida dinhi kauban silang Gloria Diaz, Winwyn Marquez, Maxine Medina ug Maris Racal.
Nataligam-an nako og hisgot si Lotlot nga may dako ug importanteng papel sa maong serye.
Pang LGBT usab ang maong serye nga ubos sa direksyon ni Joel Lamangan. Sa wala pa makakita niini pwede pa ninyong manuntan sa iWant app, Ay'g Saba!
* * *
Padayon gihapon natong nadunggan ug nakita sa social media ang mga Kapamilya stars sa ilang pakigbatok sa pag-sira sa network.
Daghang mga vocal kaayo niini sama nilang Angel Locsin, Sarah Geronimo, Nikki Valdez, Toni Gonzaga ug uban pang mga Kapamilya stars.
Bilib sab ko ining Jennylyn Mercado nga bisan usa ka Kapuso artist vocal sab kaayo kining misuporta sa Kapamilya network.
Bow jud ko nimo Jennylyn! Gani bisan og may mitira kaniya padayon gihapon ang babaye sa pagsuporta sa nasirang network.
Bisan pa og gipang-bash, padayon gihapon kini sila, ang pangutana sa uban hangtod asa ug kanus-a kini kutob? Ay'g Saba!
* * *
Daghang miingon nga dili magdugay ang relasyong Sarah Geronimo ug Matteo Guidicelli, hilabi na karon nga magtiayon na sila.
Pero human niadtong sekreto nilang kasal hangtod karon wala man tay nadunggan nga nagmahay ang duha sa ilang gibuhat.
Sa pagkakaron malipayon nga nagpuyo isip bana ug asawa si Matteo Guidicelli ug Sarah Geronimo, malipayon sila nga nagmahal ug nagsilbi sa usag-usa, Ay'g Saba!