Binasi sa Isaias 55:1-3; Salmo 145; Taga-Roma 8:35-39; Mateo 14:13-21
GANAHAN kaayo kong maminaw sa mga istorya sa akong ginikanan mahitungod sa pagsugod nila sa ilang kaminyuon. Daghan silag sakripisyo nga giagian. Usa ra ka kuwarto ang girentahan. Way klaro ang katulganan. Apan malipayon man sila. Bahalag saging basta labing.
Sa natiguwang na sila, hamugaway ilang kinabuhi bisan pag dili sila kuwartahan. Gani mibalhin sila sa gamay nga puloy-anan. Walay dakong katigayonan ni kuwarta ang ilang kabilin kanamo. Nakahuman ang tanan nilang mga anak ug naminyo gawas sa kamagulangan. Nagasahan pod sila og 23 ka mga apo. Nakasuroy pod sila sa ubang lugar sa kalibotan. Adunahan sila sa ubang mga butang. Buhong sa kahulogan ug gugma ang ilang kinabuhi hangtod namatay sila. Bahalag saging basta labing.
“Ug nakakaon ang tanan ug nangabusog, ug nakahipos silag napulog-duha ka mga bukag nga puno sa mga salin sa mga gipikaspikas,” naghisgot ang ebanghelyo. Usa sa mga nag-unang bersikolo nagkanayon: “Wala kamiy lain dinhi gawas sa lima ka buok pan ug duha ka isda”. Ang diyotay nga pagkaon nakapakaon og lima ka libo ka mga lalaki, gawas sa mga babaye ug mga bata. Apan dili lamang kana. Napulog-duha ka bukag napuno sa salin.
Namungag daghan ang “saging” nga gipaambit sa mga sumosunod ni Cristo. Kon buot hunahunaon, ang gihisgotan nga “salin” dili man sad tingali mga mumho o mga putolputol nga ulo sa isda kondili tibuok nga pan ug tibuok nga isda. Pagkamanggihatagon gayod sa Ginoo.
Mobuhagay ug moawas ang grasya sa Dios nga way bayad kay dili man sad mabayran. Sa pulong pa ni propeta Isaias: “Kamong giuhaw, ngari kamo ug inom. Bisag wala kamoy kuwarta, ngari, dawata ang pagkaon ug inom”. Ang labing mahinungdanong reyalidad diay dili mapalit kondili dawaton lamang nga malipayon ug mapasalamaton.
Hinumdoman nato nga ang pagkamanggihatagon sa Dios, gugma sa Dios ang tuboran. Sa pulong pa ni San Pablo: “Kinsay makapahimulag kanato sa gugma ni Cristo? Ang kaguol, o kasamok, o pagpanglutos, o kagutom, o pagkahubo, o peligro, o ang espada? Dili, taliwala niining tanan, may hingpit kitang kadaogan pinaagi kaniya nga nahigugma kanato”. Ang Ginoo nga maoy nagsugod sa atong relasyon sa gugma tali Kaniya mao say mopasiguro nga ang iyang gugma dili gayod mabugto.
Hinumdoman nato ang kabuhong sa gugma sa Dios atubangan sa pandemya sa Covid. Walay makabulag kanato sa gugma sa Dios gawas kon kita mismo maoy mobugto niini. Kay, sa tinuoray, dili lamang saging ang pagkalabing sa Dios kondili tanang kaayohan sa langit ug sa yuta.
Motuo ka ba sa panultion nga bahala nag saging basta labing?