TUNGOD sa pagbukas sa borders gumikan sa pagpaubos na sa dakbayan sa Sugbo sa general community quarantine (GCQ), gilauman ni Talisay City Mayor Gerald "Samsam" Gullas nga mapun-an pa ang isolation facilities sa syudad.
Kini tungod sa nahitabong pagsaka sa mga kaso sa mga nag positibo sa siyudad sukad sa pagbukas sa borders sa duha ka mga siyudad, hinungdan nga mas sayon na nga makalusot ang mga Sugboanon ug gilantaw nga mas dali ang transmission sa kagaw.
"It has happened before, with movement back in other areas in Cebu, hopefully the rising numbers of June will not come back to haunt us again. A 2nd wave is a very big possibility if we don’t remain vigilant against this virus, " matod sa mayor.
Sa Sabado, Agusto 1, 2020, gisusi ni Gullas ang Department of Health (DOH) 7 ug PhilHealth accredited nga isolation facility sa Barangay Lawaan II.
Moabot sa 60 ka mga pasyente sa coronavirus disease (Covid-19) ang mahimong ma-accomodate sa maong pasilidad.
“Ang lugar gi andam na na sa atong mga doctors. It will be good for 60+ rooms. Gi andam na sad nila asa ang mga green zones and red zones sa facility. There will be nurses on standby 24/7, and we have already set the guidelines and protocols for the facility,” matod ni Gullas.
Gilaraw sa mayor ang pag balhin na sa mga pasyente sa pasilidad nga kasamtangan nga nahimutang sa Barangay Lagtang.
Sa kasamtangan nga gidaghanon, moabot na sa 736 ka mga positibong kaso ang natala sa siyudad, 123 ang aktibo, 536 na ang naka recover ug 74 ang namatay.
Kon padayon nga mosaka ang kaso sa Covid sa syudad, gilaraw ni Gullas nga mahimong prayoridad ang mga pasyente nga nag edad og 50-anyos pa taas, postpartum patients, ug kadtong duna na'y gihambin nga sakit. (ANV)