NAGSUGOD na sa pagpanawat og mga aplikante ang Mandaue City Business Permit and Licensing Office (BPLO) sa mokuha og special permit to operate (SPO) sa mga internet cafe, fitness gym ug grooming services.
Kini human nga gianunsyo sa Inter-Agency Task Force for the Management of Emerging Infectious Disease (IATF-MEID) nga motugot na sa pag-abli sa nahisgutan nga mga negusyo sa mga lugar nga gipailawom general community quarantine (GCQ) hangtod sa 30 porsyento nga kapasidad sugod sa Agosto 1, 2020.
Si Atty. August Lizer Malate, pangulo sa BPLO, nisulti nga nagsugod na sila sa pagdawat sa mga aplikasyon sa mao nga mga establisemento nga giklasipikar sa Category IV.
Lakip sa mga establisemento nga sagad sila makadawat og mga aplikasyon gikan sa mga internet cafe.
Dugang pa ni Malate nga nakadawat sila og duha ka mga aplikasyon gikan sa fitness gym ug spa.
Bisan kon giaprubahan sa IATF ang pag-abli niini, sigon ni Malate nga wa pa nila hingpit nga gipatuman ang pag-abli sa mga establisemento samtang naghulat pa sila sa guidelines gikan sa Department of Trade and Industry (DTI).
Tungod niini, wa nila giisyu ang SPO sa mga establisemento kon wala’y gi-isyu ang DTI nga official guidelines.
Bisan kon gipahibawo na pinaagi sa balita sa pagbukas sa mao nga mga establisemento, wa pa hinuon makadawat og daghang aplikasyon ang BPLO.
Sa higayon nga mopagawas na sa guidelines ang DTI, mag-post sab sila sa ilang official Facebook page og infographics aron mas sayon nga sumbanan sa mga negosyante.
MOGINHAWA BAYA
Bisan pa, giangkon ni Malate nga naglibog siya kon unsa ang mga sumbanan labi na alang sa fitness gym.
Gipasabot niya nga sa panahon sa pag-ehersisyo, ang usa ka tawo hangakon ug magkinahanglan nga mohanggap ug mopagawas og daghang hangin.
Gani sa mga internet cafe sab, sigon ni Malate, nga base sa taho ngadto sa National Capital Region, naglisod sila sa pag-monitor sa mga tawo sa internet cafe kon essential ba ang giadto o games lang.
Isip pangulo sa BPLO, matod ni Malate nga mouyon siya sa pag-abli usab sa mao nga mga establisemento aron matabangan ang mga trabahante nga pipila na ka buwan nga way trabaho ug mga negosyo nga dugay na sab nga nasira.
Apan sa iyang personal nga opinyon, mouyon lang siya kon adunay makatarunganon nga sumbanan nga ipatuman ngadto sa maong mga establisemento ug mosalig lang sab siya sa mga negusyante nga motuman niini. (KFD)