BISAN pa sa direktiba sa Department of Education (DepEd) nga mao usay gusto ni Presidente Rodrigo, nga wa unay ipahigayon nga face-to-face classes sa mga tunghaan sa nasud, gisugyot ni Cebu Governor Gwendolyn Garcia ang pagpahigayon og atubang nga pagtudlo sa mga tinun-an sa kindergarten ug Grade 1.
Apan sa sitio level lang, ilabi na sa mga dapit nga way natala nga mga kaso sa coronavirus disease (Covid-19).
Kini aron pagsiguro nga makakat-on ang mga tinun-an sa mga pampublikong tunghaan sa Lalawigan sa Sugbo.
"They should've been broken down into specific schedules, unya asa nga areas. Kinsa man ni nga teaching courses, so that this can already be presented to DepEd nga kon wa may face-to-face sa classroom in a smaller number or an open area, tingali adto didto puro unya maestra gyud," nagkanayon si Garcia.
Matod ni Garcia nga maglisod pagsabot ang mga tinun-an kon module lang ang basehan sa pagtuon.
Ilabi na nga duna usa'y mga ginikanan nga wa makatungha ug maglisod pagtudlo sa ilang mga anak.
"Pinaka importante ang Kinder ug Grade 1 kay unsaon man na pagkasabot sa bata kon module inyo i-padala? How will they identify nga mao na ang yellow, blue, green?," matod ni Garcia.
Dugang niya nga limitahan lang ang gidaghanon sa mga tinun-an nga motungha pinaagi sa pag schedule aron nga makatuman gihapon sa health protocol sama sa physical distancing.
Gipasabot sa gobernador nga gikinahanglan ang magtutudlo sa pagpasabot sa kindergarten ug Grade 1 kay sa maong mga ang-ang magsugod og kat-on ang bata sa pagbasa, pag-ihap, pag-ila sa mga kolor ug uban pa.
"There are realities from the ground that it looks very nice. But will this achieve education? Basin og we will just be spending too much unya at the end of four months, wa'y nahibaw an ang bata," padayag sa gobernador.
Sa pag sugod sa klase sa mga tinun-an sa Agusto 24, modular ang teaching method nga gamiton alang sa mga tinun-an nga walay access sa internet.
Gipahibaw usab ni DepEd Province Schools Division Superintindent Dr. Marilyn Andales nga gikatakda ang pagpatuman sa face-to-face classes sa Enero 2021 subay sa direktiba sa kaulohan.
"So, modular ta for those students nga walay internet and tools. But for those with internet and tools, pwede ra siya mag online but we will still give the modules," dugang ni Andales. Si Duterte di gusto og face-to-face nga klase hangtod ang mga tinun-an ug maestra mabakunahan batok sa Covid-19. (ANV)