NAGKAHAYAG na ang bike lanes sa Dakbayan sa Sugbo kay duna na gani rota nga natumbok ang Siyudad. Moabot og 15 kilometro ang loop nga bike lane nga manukad sa Duljo Fatima nga mopadung sa Guadalupe ug mosangko sa Plaza Independencia.
Dunay plano ang kadagkuan sa Dakbayan sa Talisay, Cebu City ug Mandaue nga takduon ang bike lanes nga molagbas sa tulo ka mga siyudad. Mahimo kaayo ni gikan sa Talisay agi sa N. Bacalso avenue, lagbas sa dan P. del Rosario, Imus ngadto na sa Cebu North Road sa Mandaue City.
Kon butangan kini og bike lanes, makaayo kaayo sa mga tawo nga nag bike-to-work kay naa na silay maagian nga luwas. Kana lagi kon di paagian og four-wheeled ug mga motorsiklo.
Kining mao nga mga dan igo ang gilapdon alang sa bike lane nga exclusive, di sharrow. Lisod man gud kon ang dan hagip-ot unya di paagian og laing mga sakyanan. Di sab tanang mga karsada haum alang sa bike lane. Maayo gani nga ang prayoridad mao ang lapad nga mga dan alang sa bike lane kay kadaghanan niini agian sa mga nag bike-to-work.
NANAGHAN
Ang akong higalang engineer ug photographer, Reynan Opada, ni-post sa iyang Facebook page og hulagway nga napuno sa mga biseklita ang usa ka parking area sa Ayala Center Cebu. Ingon pa sa among laing higala nga photographer nga di siya motuo kay maorag naa sa Japan ang hulagway.
Sa pagkakaron, di angay ikahibung kon ang mga parking area nga iya ra sa four-wheeled nga mga sakyanan, mapuno na sa mga biseklita. Ning panahon sa Covid-19 pandemic, ang biseklita usa ka paagi sa paglikay sa Sars-Cov-2, ang kagaw sa Covid-19.
DI RAS PILIPINAS
Kining pagpanaghan sa mga biseklita wa lang ni mahitabo dinhi sa Pilipinas. Mao ni ang trend karon didto sa Europe. Sa uban ganing dagkong mga siyudad didto, tagtulo pa ka buwan ang reservation una ka pa makapalit og biseklita. Ingon niana ka taas ang demand sa biseklita.
Sa ako nang giingon, ang biseklita mao ang labing luwas nga matang sa transportasyon panahon ning Covid-19. Di ka man gud mosagol sa daghang mga tawo nga maoy imong masinati kon mosakay ka og PUJ, bus ug uban pa. Bisan mag taxi ka, dunay kahigayunan nga makakuha kon malimot ang drayber sa pag disinfect.
Sa kalisod sa panginabuhi karon, pila lang kaha ang maka afford sa pagpalit og two-wheeled nga sakyanan? Mao na ang biseklita mao dayon ang madangpan.