HUWEBES Santo na. Panahon sa pagpamalandong. Ania koy nadawat nga reklamo kabahin sa mahal nga bayranan sa kasal.

Dear Super Bobby;

Maayong adlaw kanimo Sir, Hinaut nga anaa ikaw sa maayong panglawas. Usa ako sa imong tigpaminaw sa matag buntag nimo nga programa sa DYSS Super Radyo ug tigbasa sa imong column sa Superbalita ug Sun.Star Cebu. Kining akong concern mahitungod sa simbahan sa St. Therese Parish Church sa Lahug.

Ako si Rhea Marie Fleurdeliz Perez, 28 anyos ug lumolopyo sa barangay Lahug nga nahisakop sa Parokyang St. Therese of the Child Jesus. Nagplano akong magpakasal karong pipila ka buwan nga uma-abot, apan sa dihang nangutana ako sa simbahan unsay mga bayranan kung magpakasal. Nadismaya ako sa akong nahisayran nga P6,000 ang mabayran sa simbahan apil na ang pari ug ang choir. Apan sa dihang nangutana ko nga kung walay apil ang choir ug pari mao lang gihapon ang kantidad sa mabayran.

Super Bob, nangayo ako kanila ug justification kung asa mopadulong ang 6T. Apan ingon sila nga ang 1T pra sa construction sa simbahan ug ang uban adto na sa taas. Regarding sa construction sa simbahan Super Bob dili ba angay voluntary na siya? Kay sa ako nahibaw-an taga simba nako every Sunday mangayo sila ug donation para sa simbahan of course dili sa pag-unsa Super Bob usa pud sa active nga muhatag ug donation diha.

Pero Super Bob ngano ingon niana man ka mahal, nga ang ako gipangayo ang bendisyon ra man sa Ginoo. Naa na diay bayad ang bendisyon karon sa Ginoo pinaagi sa pari? Kabahin sa church rental ingon ba jud ni-ana ka mahal para lang sa one hour and 1/2 nga seremonyas? Super Bob maayo unta para sa mga tubig-tubigan kay maka-afford sila, unsaon nalang Super Bob sa sama kanako nga usa ka ordinaryong tawo?

Dako kaayo akog respito sa sakramento sa Pagminyo kay matag simba nako mao na kasagaran ang wali sa pari kabahin sa ka importante sa Sakramento.

Kon kabahin usab anang seminar og interview ingon ba gayod niana ka mahal ang bayad sa speaker/facilitator? Kahibalo ko nga dili lang ako ang nadak-an sa bayranan sa simbahan. Hinaot makapabuka kining akong sulat sa mga parokyano diha sa maong parokya.

WA MOKONTAK

Akong gisuwayan og kontak ang moderator sa Team Ministry diha sa St. Therese Parish ang akong higala nga si Fr. Marnell Mejia sukad pa niadtong Sabado ug hangtod kagahapon apan wala gayod nako makontak. Namalibad ang iyang mga sakop sa simbahan. Morag milikay si Fr. Mejia.

Pero base sa akong nahibaw-an nga ingon ana gayod ang bayranan.

Gani sa Cebu Cathedral mokabat man ngadto sa 50 mil ka pesos ang bayranan labi pa kon paandaron ang aircon. Mao usab sa ubang parokya. Tinood, daghan kaayong madiscourage niini kay dili baya basta-basta ang galastuhan sa kasal. Ang uban adto sa lang sa huwes magpakasal gumikan kay barato ra. Pero kuyaw pod lagi og ma-apil sa marriage scam.

(bobby@sunstar.com.ph/bgnalzaro@gmanetw)