Genoguin: Hulga lang ang katapat

HUMAN hulgaa ni Presidente Rodrigo Duterte sa iyang ikalimang State of the Nation Address (Sona) ang duha ka dagkong telecommunication company, nga kanunay gireklamo nga wa’y maayong serbisyo, ug kini mao Globe nga gipang-iyahan sa mga Ayala, ug Smart nga gipanag-iyahan ni Manuel Pangilinan, sa katapusan mitungha sa Malakanyang ang presidente niini.

Si Ernest Cu presidente sa Globe mituyo gyud pag-adto sa Malakanyang ug personal nga nakigkita kang presidente Duterte tungod sa hulga sa atong presidente, nga kung dili ayuhon ang ilang serbisyo, hangtud nalang sila sa bulan sa Disyembre ug ang gobyerno maoy mo-take over niini.

Sa pagkatinuod lang, dili gyud maayo ang serbisyo niining duha, daghang mga higayon nga magsulat kita niining atong kulom, kalit lang mapawong ang signal, hinungdan nga dili gilayon nako ma send ngadto sa SuperBalita tungod kay kalit mapawong ang Internet.

Sa atong touch screen cellphone nga naka data, kalit lang usab mo-awop, ug mawala ang signal, kung mobalik man, magputol-putol sa direktang pagkasulti, dili gyud maayo ang ilang serbisyo.

Kung mag-load ka og P30, ngadto sa P100 kung hikalimtan mo sa pag-off ang data, sulod sa usa ka minuto, dili kana maka-unli kay kulang na ang imong load kay ila gilayong kawatan, ingon ini ka barat ang serbisyo niining duha ka telecommunication network.

Si Cu nangatarungan sa atong presidente nga gumikan kuno sa “red tape” sa usa daw ka tower, 28 ngadto sa 30 ka permit ang pangayuon sa mga ahensya sa atong gobyerno, naglakip na kini sa barangay clearance, mao nga minus daw ang ilang mga tower.

Gikomedyahan pa sa presidente si Cu nga bitayon siya sa tower, ug dihang mitubag si Cu nga wala na’y tower, matud sa presidente bitayon siya sa lubi.

Pinaagi niii, gimandoan sa presidente si Cu nga moduol kang Finance Secretary Carlos Dominguez, DILG Secretary Eduardo Año, o ngadto kang Senador Christopher Bong Go.

Naatulan usab sa pag-adto ni Cu nga diha si Sec. Año, maghiusa daw kuno nga mga ahensya moperma og memorandum circular aron mas madali ang mga proseso sa pagkuha og mga permit.

Ang punto de vista dinhi sa maong isyu, lahi ra gyud ang usa ka pangulo nga adunay political will, ug tagdon gilayon ang mga mulo gikan sa mga tawo nga gitunto sa mga dagkong negusyante.

Kining problemaha dugay na kaayo, pila na ka presidente ang nangagi pero walay paki-alam sa mundo ang milabay nga pangulo, sa ato pa, sa dili pa moabot ang Disyembre maayo na ang serbisyo niining duha ka TELCO sa atong nasud, nga nagpakadatu sa negusyo nga dili tarong ang serbisyo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph