KARONG adlawa, magsugod nga wa nay bili ang Food and Medicine (FM) pass ug ang istriktong pagpatuman sa curfew ngari sa Davao City.
Sa laktud nga pagkasulti, gawasnon na ang kanhi naa sa balay ra gyud nagpundo sama niadtong wala ang pangalan sa FM pass, kay duha lang man ang puwede makagamit ato.
Gawasnon kung maingon gumikan kay puwede na makadugay og uli gikan sa lakaw, daghan na ang moadto sa mall, sa simbahan, sa bisan asa.
Sa miaging Biyernes giingon ni Davao City Mayor Sara Duterte-Carpio nga wagtangon na ang pagpatuman sa FM pass ug sa istriktong curfew, apan, anaa ang regulasyon sa kaugalingon.
Buot-pasabot, kinahanglan nasayod gyod pag-ayo ang katawhan sa mga angay nga himuon, mamahimong responsable diha sa mga health protocols nga gipatuman.
Ang pagwagtang sa pagpatuman FM pass ug sa curfew, wala nagpasabot nga gawasnon ang tanang tawo. Kinahanglan anaa ang pag-amping kay posible nga mabalik ang pag-lockdown kung motaas ang kaso sa Covid-19, ngari.
Mao nang ayaw gyod walaa ang FM pass, tipigi kini. Di tanang panahon ing-ani nga gawasnon, basin unya magamit na sab ang FM pass ug ipatuman gyod ang istriktong curfew kung molugdang ang resulta sa paggara sa katawhan.
Mag-amping ug di magpalabi niining panahon nga wa nay FM pass ug curfew.