KIDAPAWAN CITY -- Mikaylap na sa walo ka barangay sa Magpet sa North Cotabato ang sakit nga African Swine Fever (ASF).
Kini mismo ang gikompirma ni North Cotabato Provincial Veterinarian Chief Dr. Rufino Suropia.
Mga barangay nga grabeng giigo sa ASF gilangkuban sa Ilian, Tagbac, Bantac, Pangao-an, Poblacion, Binay, Noa ug Doles.
Moabot sa 678 ka mga binuhing baboy ang gipatay ug gisunog kung diin 189 sab ka mga hog raisers ang apektado.
Samtang padayon ang blood testing sa mga baboy sa mga kasikbit nga infected areas nga sulod sa 500 meter radius gikan sa ground zero nga apil sa culling activity.
Hinuon nang-apud-apod na og pasiuna nga hinabang ang lokal nga panggamhanan sa Magpet ngadto sa mga naapektuhan nga hog raisers.
Kantidad P2,000 ang nadawat sa matag hog raisers sa matag baboy nga gipangpatay, gisunog ug gilubong 30 kilos pataas.
Samtang giseguro sa Department of Agriculture nga makadawat og dugang tabang ang mga namuhi og baboy sa lungsod nga apektuhan sa ASF.
Gihugtan pa ang pagbantay sa mga border control checkpoints aron dili makasulod ang ASF sa mga kasikbit nga mga lungsod sa maong probinsiya. (EEF)