NATANGTANG si ALA boy Jason Pagara sa undercard sa “Philippines vs. the Rest of the World” boxing promotion nga gikatakda karong Abril 23 sa Tennis Arena sa Dubai.

Nagkanayon si ALA Promotions president Michael Aldeguer nga nakadawat sila’g pamahayag gikan sa mga nag-organisar sa Dubai nga dili puwedeng moaway sa maong nasod ang boksidor nga nag-edad og ubos sa 21 anyos.

Click here for Election 2010 updates

Kini maoy rason nga natangtang si Pagara sa promosyon kansang main event mao ang tali nila ni ALA boy Rey “Boom-Boom” Bautista ug Thai Saichon Sotornpitak. Si Pagara nag-edad pa lang og 17 anyos.

“Naa man kunoy rule ang Dubai nga dili makaaway didto ang below 21 years old. I think it’s only in Dubai,” pasabot ni Aldeguer.

Tungod niini, si Pagara nabutang sa undercard sa promosyon nga buhian sa ALA Promotions karong Mayo 1 sa Waterfront Hotel sa Lahug, Cebu City.

Ang bida ning maong promosyon mao ang stablemate ni Pagara nga si Michael Domingo, kinsa makigharong kang Colombian Luis Melendez (mabasa sa banner story).