ANG dakbayan sa Talisay nakatala na og 739 nga kaso sa nataptan sa Covid-19 sa kasamtangan human nga dunay nadugang nga tulo ka mga indibiduwal ang nagpositibo kagahapon, Agusto 2.
Gipagawas kini nga impormasyon sa Talisay City Public Information Center Facebook Page kagahapon, Agusto 2.
Samtang, nag-usab-usab ang talaan sa kaso sa Covid-19 sa Talisay sa katapusang semana sa miaging buwan.
Sa tulo ka bag-ong kaso, ang usa gikan sa Barangay Pooc samtang duha sa Barangay Biasong.
Ang kinatibuk-ang kaso niabot na sa 739 ang nataptan samtang ang nakarekuber na niini anaa na sa 539 ka mga indibiduwal ug moabot sa 77 ang namatay.
Ang aktibong kaso sa kasamtangan nga gimonitor sa kagamhanan anaa nalang sa 125 ka mga pasyente
Samtang, timaan sa pagpangandam sa hinayhinay sa pagbalik na sa ekonomiya sa Talisay, dunay giandam karon nga pasilidad alang ngadto na sa mga nagpositibo sa Covid-19 nga usa ka motel.
Si Talisay City Mayor Gerald Anthony ‘Samsam’ Gullas nibutyag nga niadtong unang higayon nga giablihan ang utlanan sa matag siyudad, nabantayan usab niini nga kalit ang pagsaka sa maong kaso nga natakbuyan sa maong virus.
Apan tungod sa mga gipatuman nga estratehiya, hinayhinay usab nga nakontrolar ang pagsaka sa mga nagpositibo.
Sa ilang monitoring, anaa lang sa 110 ang aktibong kaso nga adunay 536 ang nakarekuber nga adunay 74.1 porsyento.
Matod ni Gullas, ang bag-ong isolation facility makatabang sa pagpaubos pa unya sa kaso sa mga magpositibo. Ang maong pasilidad naa sa Barangay Lawaan 2 sa maong siyudad.
Samtang gibisita sa mayor ang maong lugar kun diin gitagaan na og akreditasyon sa Department of Health (DOH).
Anaa sa 60 kapin ka mga lawak ang giandam sa mga doktor nga adunay green ug red zones.
Ilang nasabutan usab kon unsa ang guidelines nga ipatuman sa maong pasilidad lakip na ang pagbutang og 24 oras nga nurses nga naka-standby.
Kon pananglit modaghan ang nagpositibo, ilang iprayoridad ang mga nag-edad 50 anyos o kadtong adunay gipamati nang daan sa ilang kalawasan.
Gipanghinaut ni Gullas nga magamit na ang bag-ong pasilidad sa sunod semana.
Samtang ila usab nga hinay-hinayon sa paglihok ang dugang pasilidad nga anaa sa Barangay Lagtang. (BBT)