Ecleo dad-on sa Sugbo?

File photo
File photo

HUGOT nga seguridad ipatuman sa Police Regional Office (PRO) 7 kon ugaling dalhon sa dakbayan sa Sugbo ang supreme master sa Philippine Benevolent Missionaries Association (PBMA) Ruben Ecleo Jr. human ni masikop didto sa kaulohan niadtong Huwebes sa kaadlawon, Hulyo 30.

Nangandam ang PRO 7 kon dalhon na sa dakbayan ang numero unong most wanted person sa listahan sa Department of the Interior and Local Government nga si Ecleo.

Si Ecleo adunay warrant of arrest sa kasong parricide nga giluwatan ni Judge Soliver Peras sa Regional Trial Court Branch 10 sa dakbayan sa Sugbo ug dako ang posibilidad nga dalhon kini dinhi aron ipresentar sa korte.

Matod ni Police Brigadier General Albert Ignatius Ferro, hepe sa kapulisan sa Central Visayas, nga kon mahitabo man kini hugot nga seguridad ang ilang ipatuman tungod kay usa ka impluwensyado ang maong dinakpan. Nagtuo ang heneral nga aduna pa dinhi sa Sugbo ang diehard followers ni Ecleo diin nanalipod kaniya sa dugay na nga panahon.

Dili ikalimod nga sa dihang gidakop si Ecleo didto sa Dinagat Island sa Surigao del Norte niadtong 2004 daghang kinabuhi ang nakalas tungod sa pagbabag sa mga pulis.

Wala usab kini isalikway ni Ferro nga adunay nagtinguha nga i-rescue ang ilang supreme master gikan sa kustodiya sa kapulisan.

Wala pa hinuon makig-alayon ang National Capital Region Police Office alang na sa pagbiyahe ni Ecleo sa Sugbo.

Dugang ni Ferro nga ang mohatag sa seguridad ni Ecleo mao ang mga sakop sa Special Weapons and Tactics (Swat).

Nasikop si Ecleo sa iyang panimay sa usa ka subdivision sa Barangay Balibago, Angeles City sa Luzon sa mga sakop sa Regional Special Operations Group sa National Capital Region Police Office.

Matod ni Police Major General Debold Sinas, hepe sa NCRPO nga nahinabi sa Superbalita Cebu, nga gisugdan nila ang ilang pagpangita ni Ecleo niadtong Enero didto sa Dinagat island apan nasuta sa surveillance nga nibalhin na kini sa kaulohan.

Nagpadayon ang ilang pagpaniid niini hangtod nga ilang natultulan ang balay sa PBMA supreme master ug wala na kini biyai hangtod nga nigawas kini sa balay aron moduwa og golf diin gihimo dayon ang pagdakop. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph