IPAUBOS sa swab test ang mga empleyado sa munisipyo sa lungsod sa Minglanilla human dunay mga kawani sa upat ka mga buhatan nga positibo sa Sars-CoV-2, nagdala sa coronavirus disease.
Kini maoy gipahibawo ni Minglanilla Mayor Elanito Peña sa Agusto 2.
Niini, usa ka kamandoan ang giluwatan sa mayor sa Agusto 3, Executive Order 29, nga nagmando sa hinanali nga pagpasira sa munisipyo sulod sa upat ka adlaw.
Epektibo kini gikan sa Martes, Agusto 4, hangtod sa Biyernes Agusto 7.
Gipahibawo ni Peña nga nalakip sa mga opisina nga may empleyado nga nagpositibo sa Covid mao ang Municipal Agriculture Office, Budget Office, Treasurer’s Office, ug Municipal Engineering Office.
"Mag-agad pa ko sa protocol sa DOH kay first contact pa man una gyud i-test. Pirmiro ana naigo Agriculture maong nag disinfect mi. Unya kay nasundan naman nuon," matod ni Peña.
Ubos sa kamandoan sa mayor, wala'y bisan kinsa nga gitugotan sa pagsulod sa mga opisina kon walay pagtugot gikan sa Municipal Health Office (MHO).
Samtang gisirhan ang edipisyo, mag work-from-home lang una ang mga empleyado.
Gawas lang sa mga frontliners sama sa health personnel, emergency responders, traffic, social welfare services ug uban pang uniformed personnel.
Hinuon, matod ni Peña nga sa iyang bahin, di pa siya makabiya sa iyang opisina nga anaa usab sa sulod sa munisipyo tungod sa nigtapun-og niini nga trabaho.
Dugang niya nga maayo ug himsog ang kahimtang sa iyang panglawas bisan sa nagkadaghan nga mga kaso sa Covid-19 sa lungsod.
"Okay raman nuon ko. Mag mask man sad ko sa opisina. Naay air purifier unya face shield. Wa man nuon koy gipamati kaluoy sa Ginuo. Kay daghan kaayo kog meeting para sa covid."
Sa kasamtangan nga gidaghanon. nakatala na og 396 ka mga pasyente sa Covid 19 ang lungsod, 98 niini ang aktibo.
Hinuon, 278 na ang nakarecover sa sakit, apan 20 na usab ang namatay. (ANV)