NATANGTANGAN og duha ang mga kandidato alang sa posibleng sunod nga makontra ni Filipino boxing icon Manny Pacquiao.
Kini human nagkasinabot ang mga kampo nila ni Eroll Spence JR. ug Danny Garcia nga magsangka ang duha ka mga boksidor sa ulahing bahin ning tuiga alang sa World Boxing Council (WBC) ug International Boxing Federation (IBF) welterweight titles.
Mismong ang WBC mipagawas og pamahayag aron kompirmahon kining maong kalambuan.
“Finally...Errol Spence Jr and Danny García will clash on November 21st at a venue to be announced,” pamahayag sa WBC nga napatik sa www.philboxing.com.
“Spence will defend his WBC welterweight title against former champion Danny Garcia in a match expected to be a classic.”
Si Spence, kinsa adunay 26-0, 2KOs nga rekord, gikan sa makapaukyab nga split decision nga kadaugan batok kang Shawn Porter niadtong Septiyembre, 2019.
Usa ka buwan human niini, diriyot makalas ang kinabuhi ni Spence human makasinati og aksidente sakyanan. Hinuon, hingpit nang naalim ang angol ni Spence.
Sa iyanng bahin, si Garcia gikan sa desisyon sab nga kadaugan batok kang Ukrainian Ivan Redkach niadtong Enero, 2020.
Sa kasamtangan, sila na lang si Ultimate Fighting Championship superstar Conor McGregor ug World Boxing Organization (WBO) welterweight king Terrence Crawford ang makonsiderar nga lig-ong mga kandidato sa posibleng makontra sa Pambansang Kamao ng Pilipinas.
Ning bag-uhay lang, adunay pasumbingay si McGregor kabahin sa potensyal nilang panagharong ni Pacquiao pinaagi sa iyang Twitter account ug Tagalog pa ang mensahe niini.
“Tinatanggap ko),” tweet ni McGregor, kinsa tatawng nagpasabot nga iyang gidawat ang tanyag gikan sa kampo sa fighting senator nga magkombati sila ibabaw sa boxing ring.
Hinuon, ang maong mensahe ni McGregor nagpadayong usa ka misteryo alang sa boxing fans.
Sa laing bahin, si Top Rank boss Bob Arum misaad nga buhaton niya ang tanan aron mahan-ay ang away nila ni Pacquiao ug Crawford alang sa usa ka world unification bout.
Si Pacquiao maoy tag-iya sa World Boxing Association (WBA) welterweight belt. (ESL)