MIBAHAD og knockout si kanhi world heavyweight undisputed champion Mike Tyson kabahin sa iyang exhibition bout batok kang Roy Jones Jr. nga gikatakda karong Septiyembre 12, 2020 sa California.
Bisan sa edad nga 54, gustong pamatud-an ni Tyson nga aduna gihapon siya’y saktong kusog ug iugbok pagbalik ang iyang dungog isip “Baddest Man on the Planet.”
Si Tyson, kinsa naila nga usa ka mangtas nga knockout puncher sa iyang kinatibuk-ang karera, miklaro nga seryuso siya sa iyang intensyon nga pakamangon si Jones bisan exhibition bout ra ang ilang away.
“This is a search and destroy and I’m looking forward to recapturing my glory,” matod ni Tyson sa interbyu sa TMZ nga napatik sa gmanews.tv.
“If the opportunity comes [I’ll go for the knockout], I’m always looking for it. The fighting game is what I’m about and hurting people is what I’m about.”
Gilaumang makaukyab kining maong panagsangka gumikan kay hasta si Jones, kinsa mibahad sab ipagawas niya ang tanan niyang makaya aron lupigon si Tyson.
Si Tyson katapusang miaway niadtong 2005 diin gipaundang siya ni Irish journeyman Kevin McBride sa 6th round.
Daghan ang mingsupak nga mobalik og away si Tyson lakip na ang iyang mga anak apan alang sa labing batan-ong nahimo nga heavyweight world champion, wala’y angayang kabalak-an gumikan kay pareho silang preparado ni Jones.
“Don’t worry about us,” matod ni Tyson. “We’re both professionals." (ESL)