Lalakeng hubog gikan sa birthday nagmotor, nabangga, patay

LALAKE hubog namatay human iyang gisakyan nga motorsiklo napasok sa nag-park nga sakyanan niadtong Dominggo sa alas 7:30 sa gabii, Agusto 2, 2020, sa Barangay Tapilon, lungsod sa Daanbantayan.

Si Erwin Buan, 47, minyo, wa makabantay sa trak nga gi-park duol sa ilang balay.

Si Buan, kinsa nagpuyo sa nahisgutang barangay, dead-on-arrival human nakaangkog grabing kadaot sa ulo ug kalawasan.

Si Police Staff Sergeant Leliano Pepito, imbestigador sa Daanbantayan Police Station nga nahinabi sa Superbalita Cebu, nagkanayon nga si Buan gikatahong hubog, kusog nga nakapadagan sa iyang motorsiklo gikan sa birthday party sa iyang paryente sa Barangay Maya sa mao nga lungsod.

Samtang duol na unta siya sa ilahang balay, wala siya makabantay sa Isuzu Elf (YKY 779) nga gipanag-iya ni Marcial Gastado nga gi-park daplin sa karsada. Giingong sa kakusog sa iyang pagpadagan, kusog usab ang impact tali sa duha ka mga sakyanan.

Ang kahubog samtang nagmaneho usa sa mga hinungdan sa makamatay nga aksidente. (GPL)