MEDYO dan-ag ang nawong ni Presidente Rody Duterte nga nakig-atubang sa katawhan niadtong niaging semana human sa panagtigom sa mga sakop sa Inter-Agency Task Force (IATF) for the Management of Emerging Infectious Diseases.
Iyang gipahibalo sa madlang pipol nga dakong purohan nga anaa nay bakuna batok sa gikasilagan nga Covid-19 "pandamay" busa hasta niyang lipaya nga mobalik na kita sa "old normal."
Libre na unya kitang mosuroy sa bisan asang lugar sa nasud nga dili mahadlok. Di na magmaskara nga mora'g si "lone ranger" o kaha morag mga tulisan nga di magpakita sa atong mga nawong.
Gipahibalo usab sa presidente nga posibleng ang tambal nga nahikaplagan sa China ang ipaggamit dinhi sa Pilipinas. Nisaad na daw ang kagamhanan sa atong bag-ong best friend nga usa kita sa mga nasud nga unang mahatagan sa maong bakuna.
Gawas sa China, daghan pud nga mga nasud nga anaay bakuna batok sa Covid-19. Ang pangutana na lang kung kanus-a kini nato makuha og tagpila sab? May bakuna nga naaprubahan na sa Amerika nga mokabat og sobra Php 20,000 ang matag turok ug nagkinahanglan ug unom ka turok aron siguradong tipok ang virus.
Kung di ka mamatay sa Covid, mamatay sab ka sa kamahal sa tambal. Gawas niini, anaa pa ang atong kaugalingong tambal nga gihiling karon sa Department of Science and Technology ug sa Philippine General Hospital nga pwedeng isampok sa virus sama sa virgin coconut oil ug ang dahon sa lagundi.
Sa dagan karon, morag walay Pinoy nga makadawat sa premyo nga gihanyag ni PRody sa grupo nga unang makahimo ug bakuna batuk sa pandemya. Pero bisan pa man, basin sa umaabot nga panahon, i-rekomenda na sa Department of Health ang pagsige ug kaon sa pagkaon nga tinunoan aron mawagting ang Covid.
Apil dinhi ang tinunuang nangka ug ubang gulay, suman, biko, puto ug uban pa nga anaay latik gikan sa mantika sa lubi. Mahimong simpleng sakit na lamang kining Covid nga sama sa flu nga motakboy sa panahon sa ting-ulan o kaha ang hangga og tipdas sa mga bata.
Sa pagkakaron, nangandam na ang Department of Finance nga mangalap ug P20 bilyon alang sa pagpalit niining maong bakuha nga gikan sa China ug sa uban pang nasud aron i-apodapod sa sobra 20-milyon nga mga "poorest of the poor" nga Pinoy hasta ang mga sundalo, kapulisan og mga frontliners nga nagrabehan sa maong pandemya.
Mao kini ang hinungdan nganong malipayon si PRody nga nakig-atubang sa tanan dili parehas sa niaging mga semana nga dili ma-drowing ang iyang nawong sa daghan kapalpakan sa iyang administrasyon sa pagdumala sa Covid-19 ug sa pagkahurot sa salapi sa gobyerno alang niini.
Para kanako, di na kaayo ikabalaka ang Covid-19 bisan tuod nakita nato nga nisaka ang ihap sa nataptan sa sakit tungod kay ubos sa 4% lamang ang "mortality rate" o ang ihap sa nangamatay tungod sa Covid kung itandi sa ubang sakit sama sa Tuberculosis.
Hinuon, dili nato ibaliwala ang mga "health protocols" kay layo pa ang Disyembre. Hulat lang ta bay sa bakuna.