NABUNTURAN, Davao de Oro -- Wa pay matumbok nga motibo ang kapulisan sa kamatayon sa retiradong sundalo nga gipusil sa wala mailhing armado sa Purok 1, Barangay Mipangi.
Ang biktima giila nga si Cresencio Maestrado Godoy, 59 anyos, minyo ug molupyo sa nahisgutang dapit.
Subay sa report, alas 11:00 sa buntag, Hulyo 29, 2020, samtang ang biktima nagkalingaw og pamul-ong sa mga tanom gawas sa ilang panimalay, duha ka wala mailhing lalaki miduol ug sa walay daghang istorya gipusil ang biktima tumong sa nagkadaiyang parte sa lawas.
Human sa pagpamusil, ang mga suspek daling misibat sa direksyon sa lungsod sa Mawab.
Samtang ang biktima gidali pagdala sa iyang pamilya sa balay tambalanan apan, gideklarang dead on arrival sa doctor.
Narekober gikan sa crime scene ang duha ka fired cartridge cases sa gituohang caliber .45 nga armas.
Patay'ng lawas sa biktima gipahiluna sa Pabilona Funeral Homes sa Purok 8, Poblacion, Nabunturan. (Dexter T. Visitacion)