BISAN kon gisugdan na sa Dakbayan sa Mandaue ang paghawan sa mga tunghaan nga gihimo nila og isolation center, gihangop gihapon nila ang ekstensyon sa paggamit niini hangtod Agusto 15, 2020.
Mianunsyo niadtong Hulyo ang Department of Education (DepEd) nga kutob lang sa Hulyo 30, 2020 ang paggamit sa mga pampublikong tunghaan.
Apan, mianunsyo sab ang Regional Inter-Agency Task Force (RIATF) nga gilugwayan nila ang paggamit sa mga tunghaan isip isolation centers hangtod Agusto 15, 2020.
Matod ni John Eddu Ibañez, executive secretary ni Mandaue City Mayor Jonas Cortes, nga nagpasalamat sab ang mga barangay kapitan sa dakbayan tungod kay aduna pa silay nahibilin nga mga pasyente sa coronavirus disease (Covid-19) nga anaa pa sa ilang barangay isolation units (BIUs).
Giproseso pa sab ang tulo ka mga tunghaan nga padayong gamiton isip isolation center sa Dakbayan sa Mandaue samtang gitrabaho pa ang isolation centers sa Norkis Park ug Cebu North Bus Terminal (CNBT).
Sigon ni Ibañez nga lakip sa tunghaan nga magpabiling isolation facility mao ang Mandaue City Central School o gitawag sab nila nga Mandaue City Central Isolation Unit.
Gawas niini, inisyal nga plano sa Dakbayan nga laing duha ka tunghaan alang sa ilang north ug south isolation unit, mao ang Cabancalan Elementary School ug Paknaan Elementray School. (KFD)