USA ka 25 anyos nga lalake naangol human nakurentihan sa Lunes sa hapon, Agusto 3, 2020 sa ibabaw sa atop sa usa ka balay sa Sityo Ubos Pundok, Barangay Basak Pardo, Siyudad sa Sugbo.
Si SFO2 Wendell Villanueva, tigpamaba sa Cebu City Fire Station, niila sa biktima nga si Letner Alcover, 25, lumolupyo sa maong dapit. Matod ni Villanueva nga si Alcover nag-ilis kini og mga sen sa atop sa balay ni Ronolfo Lucero. Giingong nahikapan ni Alcover ang live wire human nga gipalid sa hangin ang sen nga iyang gikuptan.
Ang mga sakop sa Search and Rescue Unit (SRU) sa Bureau of Fire Protection (BFP) niresponde sa lugar. Si Alcover dali nga nadala sa mga SRU personnel sa Cebu City Medical Center human gitabangan og pakanaug sa mga sakop sa Basak Pardo Emergency Response (BPER). (BBT)