APROBADO na sa Konseho sa dakbayan sa Lapu-Lapu ang pagpaubos sa citizen’s arrest sa mga Oponganon nga masakpang di magsul-ob og mask.
Kini ang gipahibawo ni Konsehal Flaviano Hiyas, majority floor leader sa konseho sa dakbayan.
Matod ni Hiyas, ilang gibutangan og mga provision ang ordinansa sa konseho kalabot sa limitasyon sa citizen’s arrest aron di usab maabosohan sa kapulisan o sa manakop nga mga concerned citizen.
Sumala ni Hiyas nga gitagaan nila ang matag indibidwal og 15 minutos nga pwedi hubuon ang mask sa pampublikong lugar o gawas sa ilang pinuy-anan.
Kini gumikan kay ang usa ka tawo aduna gayuy panahon nga mohubo sa iyang mask sama sa pagginhawa, pag-inom og tubig o ba kaha pagkaon. Kon malapas na gani og 15 minutos, hayan mahimo na kining dakpon sa usa ka concerned citizen.
Gawas niini, gibutyag usab ni Hiyas nga ang usa ka indibidwal nga masakpang di mag face mask, aduna lay usa ka oras ang usa ka concerned citizen o ba kaha kapulisan sa pagsikop niini.
Kon molapas na gani og usa ka oras ang concerned citizen o pulis sa pagsikop sa wa mag facemask, di na kini balido. (GCM)