SUPERBALITA CEBU

Traffic sa Metro Cebu mihuot tungod sa mga checkpoint

GIDAKOP: Mga traffic enforcer sa Cebu City Transportation Office (CCTO) misita sa mga taxi driver aron pagsuta kon duna ba silay identification (ID) card sa mao nga buhatan. Ang wa makapakita, ilang gidakop. (Amper Campaña)

NABANTAYAN sa traffic officers ang paghuot sa trapiko sa tulo ka mga siyudad sa Metro Cebu sa Lunes, Agusto 3, 2020 unang adlaw nga tingtrabaho sukad ang Dakbayan sa Sugbo ubos na sa general community quarantine (GCQ).

Ang traffic teams sa Mandaue City, Cebu City ug Talisay City nakabantay sa paglumbay sa mga sakyanan sa karsada.

Ilang gitumbok ang mga quarantine control checkpoint nga maoy hinungdan sa pagdasok sa mga sakyanan sa dan.

Bisan kon ang Siyudad sa Sugbo ubos na sa GCQ, ang mga quarantine checkpoint nga gipamutang sa kadalanan dihang ubos pa sa enhanced community quarantine, nagpabilin gihapon.

Ang mga Siyudad sa Mandaue ug Talisay wa usab wa molugak sa ilang border control checkpoint tali sa Siyudad sa Sugbo.

Sa Dakbayan sa Sugbo, matod ni Police Colonel Josefino Ligan, officer-in-charge sa Cebu City Police Office (CCPO), niingon nga wa na siya matingala pa tungod kay mibalik na man ang pagbukas sa negosyo sa Dakbayan sa Sugbo hinungdan nga ang mga tawo nagsugod na usab sa trabaho.

Ang nakapasamot sa traffic tungod sa mga quarantine checkpoint diin tanang sakyanan susihon kon aduna bay saktong papeles sama sa quarantine ug travel pass.

“There’s so many coming in. Police are conducting checkpoints everywhere. Police are checking if they are really indeed employees of establishments that are allowed. So, they need to expect traffic. When their office time is around 8am, they need to leave early in their residence para dili na sila matanggong sa traffic,” matod ni Ligan.

Sa Dakbayan sa Mandaue, ang border control points paingon sa Dakbayan sa Sugbo maoy hinungdan sa kahuot sa trapiko.

Ang mga motorista nakasinati og paghuot sa dan Lopez Jaena St., Hernan Cortes St. Barangay Panagdait, ug sa Ouano Avenue, matod sa Traffic Enforcement Agency of Mandaue (Team).

Si John Eddu Ibañez, executive secretary ni Mandaue City Mayor Jonas Cortes, niingon nga tungod nga giluagan na ang klasipikasyon sa quarantine sa Dakbayan sa Sugbo, nanggawas na sab ang mga tawo.

Gani, mihangyo siya sa katawhan labi na sa mga Mandauehanon nga di na lang mogawas kon di essential ang tuyo niini aron di na makadugang sa kahuot sa trapiko ug kalas lang sa gasolina.

Gawas niini, sukad sa pag-us-os ngadto sa GCQ sa dakbayan sa Sugbo, nibalik na sab ang pampublikong transportasyon sa dakbayan sa Mandaue nga makalusot paingon sa Cebu City.

Katong wala pa nibalik sa enhanced community quarantine (ECQ) ang Cebu City, ang mga rota sa bus sa dakbayan sa Mandaue maabot ngadto sa SM City Cebu, I.T. Park, Country Mall ug sa Ayala Center Cebu.

Aduna nay 120 ka mga bus nga nagdagan sulod sa dakbayan sa Mandaue nga paingon sa kasikbit niini nga mga siyudad ug lungsod.

Napulo ka mga bus ang modagan sa matag rota.

Matod ni Ibañez nga dili na susama niadtong unang mga adlaw nga gipadagan ang mga bus nga dugay maabot ang sunod nga bus.

Karon, walay 10 minutos, maabot na ang sunod nga bus nga susama og rota.

SAYO SA BUNTAG

Sulod sa pila ka mga buwan ang siyudad sa Talisay nakatagamtam sa kahamugaway sa dalan, apan sugod sa Lunes, balik nga nasinati ang grabe nga trapik sa siyudad.

Ang traffic chief sa Siyudad sa Talisay, Jonathan Tumulak, sa interview sa mga sakop sa media, nibutyag nga daw sama kaniadto nga wa pay pandemya ang nanggawas nga sakyanan sa karsada.

Dugang ni Tumulak nga daghan ang mga sakyanan ang nipadung sa Syudad sa Sugbo kagahapon.

Sa iyang monitoring, nagsugod ang paghuot sa trapiko mga alas 6 sa buntag hangtod sa alas 11 sa buntag.

Samtang nasinati usab sa Superbalita Cebu ang katrapik sa gagmay nga karsada sa Dakbayan bisan kon niabot na sa alas 12 sa udto kagahapon.

Ang Natalio Bacalso Avenue padayon nga gisirhan samtang nagpatuman ang Siyudad sa Sugbo og one exit, one entrance. (KFD, AYB, BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph