PAREHAS ra man ang lain-laing klase sa mga quarantine. Naa man gihapon ang Covid-19. Buot ipasabot, mas luwas alang sa mga lungsoranon ang motago lang gihapon sulod sa balay.
Bisan pag enhanced community quarantine (ECQ), modified enhanced community quarantine (MECQ), general community quarantine (GCQ) ug modified general community quarantine (MGCQ). Naa ra gihapon ang Covid-19 sa gawas.
Makatakod gihapon ang mga tawo nga positibo sa Covid-19. Bisan pag nagdala kinig cal. 45 o Armalite. Bisan pag nagsakay ang tawo og tangke de geyra, manakod man gihapon ang tawo nga positibo sa Covid-19.
Alang kanako, di na kinahanglan ang mga abusadong pulis ug mga sundawo nga magbantay sa gawas. Nganong morisgo pa man sa paggawas sa balay kon walay quarantine pass? Aron lang madakpan ug mahimong biktima sa mga bogo nga pulis?
Maglibog lang sab ko nganong gitugtan na nga mangabli ang pipila ka mga tindahan. Bisan unsaon pa sa mga tindahan sa pagdani nga mobisita ang mga customer, pila ra man sab ang ilang madani nga gukdon man gihapon ang mga isog nga manggawas sa balay?
Dayon, kon mokalit sa pagsaka ang kadaghanon sa nanga-Covid, mobalik sab dayon sa mas estrikto nga quarantine. Manirado na sab ang mga tindahan nga alkansi.
Dayon, naa koy brayt nga mga amigo, mabogo sa ilang nanubrang depensa kang Mayor Edgar Labella. Bisan wala mahimong isyo, nangutana dayon kon si kinsay atong pahinungdan sa GCQ, si Mayor Labella ba o si Secretary Roy Cimatu.
Moinsister dayon nga si Mayor Labella. Apan huwat inig daghan balik sa mga ma-infected kay manghunaw na sab ang mayor. Daghan pa man ang donated nga planggana sa donor nga gitago nato sa ngalan nga Ok-Ok o ato na lang hisgutan si Koko.
Matod pa sa nakaila ni Koko sa panahon pa gyud nilang Gob. Tingting dela Serna sa unang mga panahon, di na mobaligya. Mohatag na. Basin daw, dunay brayt nga nakahunahuna nga kwartahon na lang sama sa manok. Pero kay daghan man ang mipalag, aw, donate na lang.
Wa gyud ko makasabot nganong gusto gyud kining atong mga opisyal nga mangabli ang mga tindahan apan estrikto gihapon sa mga quarantine pass. Di ba hinanggaw? Pero sigi na lang. Mangutana na lang ta sa atong amigo nga tigdepensa sa mayor. Ngano na oi?
Alang kanako, mas maayong atong dasigon ang mga negusyo nga mo-adapt sa giingong new normal. Buot ipasabot, ayaw na anang giingong brick and mortar nga tindahan. Ang merkado karon naa na sa internet. Ug mo-invest na sa giingong digitalization ug ang delivery pinaagi sa paghatod gyud sa balay.
Hangtod karon, dakong bahin sa populasyon naa sa balay. Nag-work at home. Inig abli sa klase karong Agusto 24, nag-internet sa balay ang mga tinun-an, ma-adunahan man o kabus.
Busa, unsay gamit sa mga tindahang mangabli? Dayon, nasulbad na ba ang kakulang sa mga kasakyan sa mga empleyado?@anol_cebu sa Twitter