GIPAUBOS pagbalik ni Presidente Rodrigo Duterte ang pipila ka bahin sa Metro Manila sa modified enhanced community quarantine (MECQ) gikan sa general community quarantine (GCQ). Buot ipasabot mga mas hugot ug estrikto nga ipatuman ang mga lagda sa quarantine aron gyud kapugngan ang pagkuyanap sa coronavirus disease (Covid 19). Ang maong lakang sa Presidente nunot usab sa awhag sa mga medical frontliners nga ibalik sa maong quarantine status ang maong mga lugar.
Kini nunot usab sa pagsaka sa mga Covid positive cases sa maong mga lugar human gibutang sa GCQ status. Mao lagi gyud ni ang dakong problema kon medyo i-relax ang restrictions sa usa ka lugar gikan sa estrikto kaayo nga pagpatuman sa mga lagda ngadto sa mas relax nga seguridad. Bisan didto sa ubang mga nasud mao ni ang dakong problema.
Ubos sa GCQ, gitugutan na nga makabukas o maka-operate ang mga kompaniya ug makatrabaho ang mga tawo. Aduna nay public transportation ug bukas na ang mga mall. Maoy hinungdan nga modagsang ang mga tawo ug magtinakdanay na hinuon. Dili na mo-observe og social distancing ug dili na gani mosunod sa mga basic protocol. So, natural dali ra kaayo ang pagkatap sa virus.
Atong obserbahan unya ang Cebu City ug ubang mga dakbayan nga gipaubos na sa GCQ kon unsa ang mamahimong mahitabo sa umaabot nga mga adlaw. Bukas na ang pipila ka mga establisemento ug mobalik na sa trabaho ang pipila ka mga kompaniya. Dinhi nato masukod kon mapugngan ba ang pagkatap sa virus. Maayo man tong estrikto nga lagda kay puwede man sab estriktuhon sa atong kapulisan ang implementasyon sa mga lagda.
Kon pananglitan human sa Agusto 15, mosaka ang gidaghanon sa mga positive cases, si Cebu City Mayor Edgardo Labella na usab ang basulon? Kay wala may lain makita ang mga hinawayon labi pa ang iyang mga kaatbang sa pulitika. Mapugngan ba gud ni Labella ang virus kon dili mopakita og kooperasyon ug mosunod sa protocol ang kadaghanan? (bobbygnalzaro@gmail.com)