SUPERBALITA CEBU

Editoryal: Sakto si Labella

(Editorial Cartoon by Ariel Itumay)

DAGHAN ang nagbagolbol kay bisan kon ubos na sa general community quarantine (GCQ) ang Dakbayan sa Sugbo, estrikto gihapong gipatuman ni Mayor Edgardo Labella ang pagpagamit sa quarantine pass. Ngano gihapon nga naay checkpoints nga estriktong nag-inspeksyon sa mga tawo nga mangagi.

Ubos sa GCQ, base sa protocol nga gipatuman sa Inter-Agency Task Force (IATF), wa na kinahanglana ang Q-pass sa paggawas sa balay. Mao ni ang gisulti ni Interior Secretary Eduardo Año. Apan sakto ba kaha ang IATF ani nga protocol?

Niadtong Hunyo, nisaka og maayo ang mga kaso sa coronavirus disease (Covid-19) sa Dakbayan sa Sugbo. Human sa 15 ka mga adlaw, gibalik ang status ngadto sa enhanced community quarantine (ECQ). Ang Siyudad maoy bugtong dapit sa Pilipinas nga ubos sa ECQ.

Dihang gilugakan ang quarantine status sa National Capital Region (NCR) ngadto sa GCQ, anam-anam nga misaka ang gidaghanon sa mga kaso sa Covid-19. Hangtod nga niabot na og labing minos 2,000 kada adlaw. Modified ECQ na sab sila.

Dunay common nga kahimtang ang NCR ug Metro Cebu. Puro kini highly urbanized ug daghan sa mga dapit nga nagdasok ang mga balay. Di malikayan nga magdasok ang mga tawo sa usa ka dapit, busa ang pagpanakod dako kaayo og kalagmitan.

Ang paglugak sa quarantine status sa usa ka dapit wa magpasabot nga makagawas na ang tanang mga tawo. Naa gihapon ang kagaw. Gitumong kini aron makabukas na ang mga negusyo nga nanirado. Gitumong kini aron hinayhinay nang makabalik ang patigayon ug makabangon ang ekonomiya.

Busa, sakto ang gibuhat ni Labella nga bisan GCQ na ang Siyudad, gikinahanglan gihapon ang pag-obserbar sa Q-pass. Kay di baya ang IATF ang manubag kon mosaka na usab ang mga kaso sa Covid-19 sa Siyudad. Siya na sab ang pistahan sa iyang mga kritiko ug kaatbang kon mosaka ang mga kaso.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph